തിരുവനന്തപുരം: മുഖ്യമന്ത്രിയുടെ ധാര്‍ഷ്ട്യമാണ് തെരഞ്ഞെടുപ്പിലെ ഇടത് മുന്നണിയുടെ പരാജയത്തിന് കാരണമെന്ന് സിപിഐ തിരുവനന്തപുരം ജില്ലാ കൗണ്‍സില്‍ യോഗത്തില്‍ സിപിഐയുടെ വിമര്‍ശനമുയര്‍ന്നു. മുഖ്യമന്ത്രി മാറാതെ ഭരണം നന്നാകില്ല. മുഖ്യമന്ത്രിയുടെ മകളുടെ പേരിലുള്ള അഴിമതി, കുടുംബവുമായി ബന്ധപ്പെട്ട് ഉയരുന്ന ആരോപണങ്ങള്‍ എന്നിവ തിരിച്ചടിയായെന്നും കൗണ്‍സിലില്‍ വിലയിരുത്തി.
സിപിഐ തിരുവനന്തപുരം ജില്ലാ കൗണ്‍സില്‍ യോഗത്തിലാണ് മുഖ്യമന്ത്രിക്കെതിരെ സിപിഐ രൂക്ഷ വിമര്‍ശനം ഉയര്‍ന്നത്. സംസ്ഥാനത്തെ മന്ത്രിമാര്‍ക്കെതിരെയും യോഗത്തില്‍ വിമര്‍ശനമുയര്‍ന്നു. ഭരണവിരുദ്ധ വികാരം ജനങ്ങളില്‍ ഉടലെടുത്തത് തിരിച്ചടിയായി. ന്യൂനപക്ഷ പ്രീണനം പരിധിവിട്ടതും തിരിച്ചടിയായി.
പൗരത്വ ഭേദഗതി നിയമത്തിനെതിരായ പ്രതിഷേധങ്ങള്‍ മതയോഗങ്ങളായി മാറി, മതമേധാവികള്‍ക്ക് അമിത പ്രാധാന്യം കൊടുത്തു. സാമ്പത്തിക പ്രതിസന്ധിക്കിടയില്‍ നടത്തിയ നവകേരള സദസ് ധൂര്‍ത്തായി മാറി. ഈഴവ പിന്നാക്ക വിഭാഗങ്ങള്‍ ഇടതുപക്ഷത്തെ കൈവിടുകയായിരുന്നുവെന്നും വിമര്‍ശനം ഉയര്‍ന്നു.തെരഞ്ഞെടുപ്പ് തോല്‍വിയില്‍ സര്‍ക്കാരിനെതിരെ സിപിഐയുടെ പല ജില്ലാ യോഗങ്ങളിലും വിമര്‍ശനമുയര്‍ന്നിരുന്നു.
വോട്ടിംഗില്‍ പ്രതിഫലിച്ചത് സര്‍ക്കാരിനെതിരായ ഭരണവിരുദ്ധ വികാരമാണെന്ന അഭിപ്രായം എല്ലാവര്‍ക്കുമുണ്ട്. സിപിഐ സംസ്ഥാന സെക്രട്ടറി ബിനോയ് വിശ്വവും ഈ അഭിപ്രായത്തെ അംഗീകരിക്കുന്നുണ്ട്. തോല്‍വി വിലയിരുത്തുന്നതിനായുള്ള സിപിഎമ്മിന്റെ നേതൃയോഗത്തിന് ഇന്ന് തുടക്കമാകും. 
