പാലക്കാട് : അവധി ചോദിച്ച സിപിഒയെ സിഐ അധിക്ഷേപിക്കുകയും ഭീഷണിപ്പെടുത്തുകയും ചെയ്തതായി പരാതി. പാലക്കാട് നെല്ലിയാമ്പതി പാടഗിരി പൊലീസ് സ്റ്റേഷനിലെ സിപിഒ സന്ദീപിന്റെ പരാതിയില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ പാലക്കാട് എസ് പി നിര്‍ദേശം നല്‍കി. ഈ മാസം 26 നായിരുന്നു സംഭവം. പീറ പൊലീസ് എന്ന് വിളിച്ചു അധിക്ഷേപിച്ചെന്നും പരാതിയുണ്ട്.
തുടര്‍ന്ന് ബൈക്കില്‍ പോകാന്‍ ഒരുങ്ങിയ സന്ദീപിന്റെ ബൈക്കിന്റെ താക്കോല്‍ ഊരി മാറ്റി. അറസ്റ്റ് ചെയ്ത് റിമാന്‍ഡ് ചെയ്യുമെന്നും ഭീഷണിപ്പെടുത്തിയതായി സന്ദീപ് പറയുന്നു. തുടര്‍ച്ചയായി ജോലി ചെയ്യുകയാണെന്നും 10 ദിവസം അവധി വേണെമെന്നുമായിരുന്നു പാടഗിരി സ്റ്റേഷനിലെ സിപിഒ സന്ദീപിന്റെ ആവശ്യം. ഒരു കാരണവശാലും അവധി അനുവദിക്കില്ലെന്നായിരുന്നു സിഐ കിരണ്‍ സാമിന്റെ നിലപാട്.
എങ്കില്‍ മെഡിക്കല്‍ അവധി എടുക്കുമെന്നായി സന്ദീപ്. ഇതോടെ അവധി എടുത്താല്‍ പണി കളയുമെന്ന് സിഐ ഭീഷണിപ്പെടുത്തിയെന്നാണ് പരാതിയില്‍ പറയുന്നത്. സ്‌പെഷ്യല്‍ ബ്രാഞ്ച് റിപ്പോര്‍ട്ടിന്റെ അടിസ്ഥാനത്തില്‍ സംഭവത്തില്‍ അന്വേഷണം നടത്താന്‍ ഷൊര്‍ണൂര്‍ ഡിവൈഎസ്പിക്ക് എസ്പി നിര്‍ദ്ദേശം നല്‍കി. സിഐയ്‌ക്കെതിരെ പൊലീസിനകത്ത് നിന്നും നാട്ടുകാരില്‍ നിന്നും ഇതിന് മുമ്പും പരാതി ഉയര്‍ന്നിട്ടുണ്ട്.
