സിന്ധുവിന്റെ മൃതദേഹത്തില് വസ്ത്രങ്ങളില്ല,ശരീരം പ്ലാസ്റ്റിക്കില് പൊതിഞ്ഞു ,കുഴിയില് മുളക് വിതറി’
ഇടുക്കി പണിക്കന്കുടിയില് വീട്ടമ്മയുടെ മൃതദേഹം അടുക്കളയില് കുഴിച്ചുമൂടിയ അയല്വാസി മൃതദേഹം ഒളിപ്പിക്കാന് ചെയ്തത് വന് ശ്രമങ്ങള്. മൃതദേഹം പ്ലാസ്റ്റിക് കൊണ്ട് പൊതിഞ്ഞ ശേഷമാണ് അടുക്കളയില് കുഴിച്ചുമൂടിയത്. അന്വേഷണമുണ്ടായാല് പൊലീസ് നായ മണം പിടിച്ചെത്താതിരിക്കാന് കുഴിയിലാകെ മുളക് പൊടി വിതറി.വസ്ത്രം പൂര്ണമായും മാറ്റിയിട്ടുണ്ട്. മൃതദേഹം ഇന്ന് രാവിലെ പുറത്തെടുത്തു. കാണാതായ സിന്ധുവിന്റേത് തന്നെയാണെന്ന് ബന്ധുക്കള് തിരിച്ചറിഞ്ഞിട്ടുണ്ട്. ഇന്ക്വസ്റ്റ് പൂര്ത്തിയായ ശേഷം പോസ്റ്റുമോര്ട്ടത്തിനായി കോട്ടയം മെഡിക്കല് കോളേജിലേക്ക് കൊണ്ടുപോകും.അതിനിടെ കേസ് അന്വേഷണത്തില് പൊലീസിന്റെ ഭാഗത്ത് വലിയ വീഴ്ച്ചയുണ്ടായെന്ന് ആരോപിച്ച് സിന്ധുവിന്റെ കുടുംബം രംഗത്തെത്തി. സിന്ധുവിനെ ബിനോയ് കൊല്ലപ്പെടുത്തി കുഴിച്ചിട്ടതാകാമെന്ന തരത്തിലുള്ള മകന്റെ മൊഴിയുണ്ടായിട്ടും പൊലീസ് അത് ഗൗരവമായെടുത്തില്ലെന്ന് ബന്ധുക്കള് ആരോപിച്ചു. മൃതദേഹം കണ്ടെത്തിയ അടുകളയിലെ തറയിലെ മണ്ണ് മാറ്റിയെന്ന് മൊഴിയുണ്ടായിട്ടും അന്വേഷിച്ചില്ല. ആഗസ്റ്റ് 16ന് മാത്രമാണ് ബിനോയി ഒളിവില് പോയതെന്നും ബന്ധുക്കള് പറഞ്ഞു.