മാധ്യമപ്രവര്ത്തകന് ജി എസ് ഗോപീകൃഷ്ണന് അന്തരിച്ചു
തിരുവനന്തപുരം: തിരുവനന്തപുരം മെഡിക്കല് കോളജില് രോഗബാധിതനായി ചികിത്സയിലായിരുന്ന അമൃത ടി വി മുന് റീജിയണല് ഹെഡ് ജി എസ് ഗോപീകൃഷ്ണന് (48, ഏണിക്കര, പ്ലാപ്പള്ളി ലൈന് ഇടി ആര് എ-46, വസന്തഗീതം) അന്തരിച്ചു. മെഡിക്കല് കോളജില് വെച്ചായിരുന്നു അന്ത്യം. എ സി വി, കൗമുദി ടിവി എന്നീ സ്ഥാപനങ്ങളിലും പ്രവര്ത്തിച്ചിട്ടുണ്ട്. പത്രപ്രവര്ത്തക യൂണിയന്റെ മുന് ജില്ലാ ജോയിന്റ് സെക്രട്ടറിയായിരുന്നു. മാധ്യമമേഖലയ്ക്ക് പുറത്ത് കലാരംഗത്ത് വലിയ സൗഹൃദ ബന്ധങ്ങളുണ്ടായിരുന്ന ഗോപീകൃഷ്ണന് ഗായക സംഘമായ എം ബി എസ് യൂത്ത് ക്വയറിലെ സജീവ സാന്നിധ്യമായിരുന്നു. പ്രശസ്ത കഥകളി നടനായ ചിറക്കര മാധവന് കുട്ടി ആശാനെക്കുറിച്ച് മായാമുദ്രയെന്ന ഡോക്യുമെന്ററി സംവിധാനം ചെയ്തു. ഗിരീഷ് കര്ണാട് രചിച്ച് അമിതാഭ് ബച്ചനും ജാക്കി ഷെറഫും മുഖ്യ വേഷങ്ങളില് എത്തിയ അഗ്നിവര്ഷ എന്ന ബോളിവുഡ് ചിത്രത്തില് എം ബി എസ് യൂത്ത് ക്വയറിലെ അംഗങ്ങള്ക്കൊപ്പം അഭിനേതാവായി. ഭാര്യ: നിഷ കെ നായര്(വാട്ടര് അതോറിറ്റി പി ആര് ഒ), മക്കള്: ശിവനാരായണന്, പത്മനാഭന്. ഭൗതികശരീരം നാളെ ഉച്ചയ്ക്ക് 12.45 ന് പ്രസ് ക്ലബില് പൊതുദര്ശനത്തിന് വെക്കും. സംസ്കാരം രണ്ടു മണിക്ക് തൈക്കാട് ശാന്തികവാടത്തില്.ഗോപീകൃഷ്ണന്റെ നിര്യാണത്തില് മുഖ്യമന്ത്രി പിണറായി വിജയന്,മന്ത്രി റോഷി അഗസ്റ്റിന്,പ്രതിപക്ഷ നേതാവ് വി.ഡി സതീശന്, രമേശ് ചെന്നിത്തല, ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്,കെപിസിസി പ്രസിഡന്റ് കെ സുധാകരന് എംപി,എ ഐസിസി ജനറല് സെക്രട്ടറി കെ സി വേണുഗോപാല് എം പി എന്നിവര് അനുശോചിച്ചു.