കോഴിക്കോട്: ലോക്സഭ തെരഞ്ഞെടുപ്പിലെ വോട്ടെണ്ണല് നടക്കുന്ന നാളെ വടകരയില് സംഘര്ഷ സാധ്യതയെന്ന് രഹസ്യാന്വേഷണ വിഭാഗത്തിന്റെ മുന്നറിയിപ്പ്. ഇതിനെ തുടര്ന്ന് ക്രമസമാധന ചുമതലയുളള എഡിജിപി വടകരയില് ക്യാമ്പ് ചെയ്യുകയാണ്. ഇതിന്റെ അടിസ്ഥാനത്തില് ഡിജിപിയും – എഡിജിപിയും പ്രത്യേക യോഗം വിളിച്ച് വടക്കന് കേരളത്തിലെ സ്ഥിതി വിലയിരുത്തി.
വടകര നാദാപുരത്ത് കണ്ണൂര് റേഞ്ച് ഡിഐജി സന്ദര്ശനം നടത്തി. ക്രമസമാധാന നില വിലയിരുത്താനും സുരക്ഷാ ക്രമീകരണങ്ങള് സംബന്ധിച്ചുള്ള ചര്ച്ചകള്ക്കുമാണ് ഡിഐജി എത്തിയത്. ക്രമസമാധാന നില ഭദ്രമാണെന്നും ആവശ്യത്തിന് പൊലീസുകാരെയും, സുരക്ഷക്കായി അഡീ.പട്രോംളിംഗ് ഏര്പ്പെടുത്തിയതായും കണ്ണൂര് റെയ്ഞ്ച് ഡിഐജി തോംസണ് ജോസ് അറിയിച്ചു.
കോഴിക്കോട് വോട്ടെണ്ണല് കേന്ദ്രങ്ങളുടെ പരിസരങ്ങളിലും നിരോധനാജ്ഞ പ്രഖ്യാപിച്ചു. കോഴിക്കോട്, വടകര ലോക്സഭ മണ്ഡലങ്ങളുടെ വോട്ടെണ്ണല് നടക്കുന്ന വെള്ളിമാടുകുന്ന് ജെഡിടി ഗ്രൂപ്പ് ഓഫ് ഇന്സ്റ്റിറ്റിയൂഷന്സ് പരിധിയിലാണ് ജില്ലാ കളക്ടര് നിരോധനാജ്ഞ പ്രഖ്യാപിച്ചത്.
കോഴിക്കോട് കോര്പ്പറേഷന് 11, 15 വാര്ഡുകളുടെ പരിധിയിലാണ് നിരോധനാജ്ഞ. വയനാട് ലോക്സഭ മണ്ഡലത്തില് ഉള്പ്പെടുന്ന തിരുവമ്പാടിയിലെ വോട്ടെണ്ണുന്ന താമരശ്ശേരി കോരങ്ങാട് സെന്റ് അല്ഫോന്സ സീനിയര് സെക്കന്ഡറി സ്കൂളിന്റെ 100 മീറ്റര് ചുറ്റളവിലും നിരോധനാജ്ഞ പ്രഖ്യാപിച്ചിട്ടുണ്ട്. ഇന്ന് വൈകീട്ട് അഞ്ച് മണിക്ക് നിലവില് വന്ന നിരോധനാജ്ഞ ബുധനാഴ്ച രാവിലെ 10 മണി വരെ തുടരും.
നാളെ രാവിലെ എട്ട് മണിയോടെ വോട്ടെണ്ണല് തുടങ്ങും. ആദ്യ ഫല സൂചന രാവിലെ ഒമ്പത് മണിയോടെ ലഭിക്കുമെന്നാണ് സംസ്ഥാന മുഖ്യ തെരഞ്ഞെടുപ്പ് ഓഫീസര് സഞ്ജയ് കൗള് ഇന്ന് മാധ്യമങ്ങളോട് പ്രതികരിച്ചത്.12 മണിയോടെ ജനവിധിയുടെ ഏകദേശ ചിത്രം വ്യക്തമാകുമെന്നാണ് പ്രതീക്ഷിക്കപ്പെടുന്നത്.