ബെംഗളൂരു: എകദിന പരമ്പരയിലെ ആദ്യ മത്സരത്തില് ദക്ഷിണാഫ്രിക്കയെ തകര്ത്ത് ഇന്ത്യന് വനിതകള്ക്ക് വമ്പന് ജയം. അരങ്ങേറ്റം ഗംഭീരമാക്കിയ ആശ ശോഭനയും വൈസ് ക്യാപ്റ്റന് സ്മൃതി മന്ദാനയുമാണ് ഇന്ത്യക്ക് അനായാസ ജയം സമ്മാനിച്ചത്. സെഞ്ച്വറി നേടിയ മന്ദാനയാണ് കളിയിലെ താരം. സ്കോര്: ഇന്ത്യ 265/8 ദക്ഷിണാഫ്രിക്ക 122ന് പുറത്ത്. ഇന്ത്യന് വനിതകള്ക്ക് 143 റണ്സിന്റെ വിജയം. ഏകദിനത്തില് ആദ്യ മത്സരത്തിനിറങ്ങിയ മലയാളി താരം ആശാ ശോഭന 8.4 ഓവറില് 21 റണ്സ് മാത്രം വഴങ്ങി നാലു വിക്കറ്റാണ് പിഴുതത്. സ്മൃതി മന്ദാന 127 പന്തില് 117 റണ്സ് നേടി. 7,000 അന്താരാഷ്ട്ര റണ്സ് നേടുന്ന രണ്ടാമത്തെ ഇന്ത്യന് വനിതാ താരവുമായി. ബെംഗളൂരു ചിന്നസ്വാമിയില് നടന്ന മത്സരത്തില് ദക്ഷിണാഫ്രിക്കയ്ക്ക് എതിരെ എല്ലാ മേഖലയിലു ആധിപത്യം പുലര്ത്തിയാണ് ഇന്ത്യ വിജയം നേടിയത്.
33 റണ്സെടുത്ത സുനെലസ് ആണ് ദക്ഷിണാഫ്രിക്കയുടെ ടോപ് സ്കോറര്. ഏഴു പേര് രണ്ടക്കം കാണാതെ പുറത്തായി. ബാറ്റിംഗിന് ഇറങ്ങിയ ആശ 5 പന്തില് ഒരു ബൗണ്ടറിയടക്കം എട്ടു റണ്സ് നേടുകയും ചെയ്തു. പൂജ വസ്ത്രാക്കര്,രേണുക സിംഗ്,രാധാ യാഥവ് എന്നിവര് ഓരോ വിക്കറ്റ് വീതം നേടിയപ്പോള് ദീപ്തി ശര്മ്മയ്ക്ക് രണ്ടു വിക്കറ്റ് ലഭിച്ചു.