തിരുവനന്തപുരം ന്മ സംസ്ഥാനത്ത് വാക്‌സീന്‍ വിതരണനിരക്ക് കുത്തനെ ഇടിഞ്ഞു. പല ജില്ലകളിലും പ്രതിദിനം വാക്‌സീന്‍ എടുക്കുന്നവരുടെ നിരക്ക് 25 ശതമാനത്തിനും താഴെയാണ്. പരീക്ഷണ ഘട്ടത്തിലുളള കൊവാക്‌സിനോടുളള ആശങ്കയാണ് വിമുഖതയ്ക്ക് കാരണം. രോഗബാധിതരുടെ എണ്ണവും മരണവും രാജ്യത്ത് ഏറ്റവും ഉയര്‍ന്നു നില്‍ക്കുമ്പോഴും വാക്‌സീനേഷന്‍ ത്വരിത ഗതിയിലാക്കാനുളള ഒരു നടപടിയും സര്‍ക്കാര്‍ സ്വീകരിച്ചിട്ടില്ല.
പൊലീസുകാര്‍, അര്‍ധ സൈനിക വിഭാഗങ്ങള്‍, പഞ്ചായത്ത് മുനിസിപ്പാലിറ്റി, റവന്യൂ ജീവനക്കാര്‍ തുടങ്ങിയ കോവിഡ് മുന്നണി പോരാളികള്‍ക്ക് ഇന്നലെയോടെ വാക്‌സീന്‍ വിതരണം പൂര്‍ത്തിയാക്കാനാണ് ലക്ഷ്യമിട്ടത്. തിരുവനന്തപുരം ജില്ലയില്‍ 12 ന് 512 പേര്‍ വാക്‌സീനെടുത്തു. 13 ന് 947 പേര്‍. 14, 15 തീയതികളില്‍ യഥാക്രമം 300 ഉം 336 ഉം പേര്‍മാത്രമാണ് വാക്‌സീനെടുത്തത്. ആകെ 14,000 പേര്‍ റജിസ്റ്റര്‍ ചെയ്ത ജില്ലയില്‍ 2095 പേര്‍ മാത്രമാണ് ലക്ഷ്യമിട്ട തീയതിക്കുളളില്‍ വാക്‌സീനെടുത്തത്. വെറും 14. 96 ശതമാനംപേര്‍. മറ്റു ജില്ലകളിലും സമാന സ്ഥിതി. രാജ്യത്ത്് വാക്‌സീന്‍ വിതരണത്തില്‍ പന്ത്രണ്ടാം സ്ഥാനം.
പരീക്ഷണം പൂര്‍ത്തിയാകാത്തതിനെ തുടര്‍ന്ന് വിവാദത്തിലായ കൊവാക്‌സീന്‍ കുത്തിവയ്പ് തുടങ്ങിയതോടെയാണ് ആദ്യം മുതലേ അത്ര മെച്ചമല്ലാതിരുന്ന നിരക്ക് കുത്തനെ ഇടിഞ്ഞത്. പരീക്ഷണം പൂര്‍ത്തിയാകാത്ത വാക്‌സീന്‍ വിതരണം ചെയ്യുന്നതിനെതിരെ ഒരു വിഭാഗം ആരോഗ്യ പ്രവര്‍ത്തകരും കടുത്ത വിമര്‍ശനമുന്നയിക്കുന്നു. എന്നാല്‍ കൊവാക്‌സീന്‍ സുരക്ഷിതമെന്നാണ് കേന്ദ്ര സര്‍ക്കാരും വാക്‌സീന്‍ നിര്‍മാതാക്കളും പറയുന്നത്.
