തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്തിന് ലോക്കേഷന് കോഡായി. ഇന്ത്യയുടെയും നെയ്യാറ്റിന്കരയുടെയും ചുരുക്കെഴുത്ത് ചേര്ത്ത് IN NYY 1 എന്നാണ് വിഴിഞ്ഞം തുറമുഖത്തിന്റെ ലോക്കേഷന് കോഡ്. ഈ മാസം രണ്ടാം വാരത്തോടെ വിഴിഞ്ഞത്ത് ട്രയല് റണ് നടക്കും. വിഴിഞ്ഞത്ത് നേരെത്തെയുണ്ടായിരുന്ന തുറമുഖത്തിന് വിഴിഞ്ഞം എന്നതിന്റെ ഇംഗ്ലീഷ് ചുരുക്കെഴുത്തായ VIZ എന്നതായിരുന്നു ലൊക്കേഷന് കോഡ്.
അതിനാലാണ് പുതിയ തുറമുഖത്തിന് നെയ്യാറ്റിന്കര താലൂക്കിന്റെ ചുരുക്കെഴുത്ത് നല്കിയത്. കേന്ദ്രസര്ക്കാരിന് കീഴിലെ ഡയറക്ട്രേറ്റ് ജനറല് ഓഫ് സിസ്റ്റം ആന്റ് ഡാറ്റാ മാനേജ്മെന്റാണ് ലോക്കേഷന് കോഡ് അനുവദിക്കുന്ന ഏജന്സി. നാവിഗേഷന്, ഷിപ്പിങ്ങ് ഇതിനെല്ലാം ലോക്കേഷന് കോഡാണ് ഉപയോഗിക്കുക. ഇനി ഇലക്ട്രോണിക് ഡാറ്റാ ഇന്റര്ചേഞ്ച് കോഡും കസ്റ്റോഡിയന് കോഡും കിട്ടണം.
ഇമിഗ്രേഷന് ചെക്ക്പോസ്റ്റ് ക്ലിയറന്സ് അനുവദിച്ച് കിട്ടണം. നാഷണല് സേഫ്റ്റി ഇന് പോര്ട്ട് കമ്മിറ്റി അംഗീകാരവും ഐഎസ്പിഎസ് കോഡും നേരത്തെ തന്നെ ലഭിച്ചിരുന്നു. കമ്മീഷനിംഗിന് വേണ്ട അടിസ്ഥാന സൗകര്യങ്ങളെല്ലാം പൂര്ത്തിയായെന്നാണ് അദാനി കമ്പനി അധികൃതരും തുറമുഖ വകുപ്പും അറിയിക്കുന്നത്. എല്ലാ തയ്യാറെടുപ്പുകളും പൂര്ത്തിയായാല് ജൂലൈ 12ന് ശേഷം ആദ്യ ട്രയല് റണ് ഉണ്ടാകും. മുന്ദ്ര തുറമുഖത്ത് നിന്നുള്ള ചരക്ക് കപ്പലാകും ആദ്യം വിഴിഞ്ഞത്തേക്ക് എത്തുക. അത് വിജയകരമായാല് പിന്നെ തുറമുഖം കമ്മീഷനിംഗ് നടപടികളിലേക്ക് കടക്കും.
![](https://keralabreaking.com/wp-content/uploads/2020/08/KB-Logo.png)