ദില്ലി : അഴിമതിക്കാര്ക്കെതിരെ കടുത്ത നടപടി തുടരുമെന്ന് പ്രധാനമന്ത്രി നരേന്ദ്ര മോദി. അഴിമതിക്കാര് ആരും രക്ഷപ്പെടില്ലെന്നത് മോദിയുടെ ഗ്യാരന്റിയാണെന്നും പാര്ലമെന്റില് പ്രധാനമന്ത്രി വ്യക്തമാക്കി. നീറ്റ് ചോദ്യപേപ്പര് ചോര്ച്ച നടന്നുവെന്നത് തികച്ചും തെറ്റായ കാര്യമാണ്. എന്നാല് ഈ വിഷയത്തെ രാഷ്ട്രീയവത്ക്കരിക്കുന്നതും രാഷ്ട്രീയ നേട്ടത്തിന് ഉപയോഗിക്കുന്നതും ദൗര്ഭാഗ്യകരമാണ്.
വിദ്യാര്ത്ഥികളുടെ ഭാവിക്കെതിരെ പ്രവര്ത്തിക്കുന്നവര്ക്കെതിരെ കടുത്ത ശിക്ഷ ഉറപ്പാക്കുന്നുണ്ടെന്നും മോദി വിശദീകരിച്ചു. മണിപ്പൂര് കലാപത്തെ കുറിച്ച് സംസാരിച്ച മോദി സമാധാന അന്തരീക്ഷത്തിന് നിരന്തര ശ്രമം നടക്കുകയാണെന്നും നിലവില് അക്രമ സംഭവങ്ങള് കുറഞ്ഞു വരുന്നുണ്ടെന്നത് ആശ്വാസകരമാണെന്നും വിശദീകരിച്ചു. 11,000 എഫ്ഐആറുകളാണ് കലാപവുമായി ബന്ധപ്പെട്ട് രജിസ്റ്റര് ചെയ്തത്. വിവിധ സമുദായങ്ങളുമായി ചര്ച്ചയിലൂടെ പ്രശ്നം പരിഹരിക്കും.
രാഷ്ട്രീയത്തിന് അതീതമായി മണിപ്പൂരിലെ പ്രശ്ന പരിഹാരത്തിന് ശ്രമം നടക്കുന്നുണ്ട്. മണിപ്പൂരില് സംഘര്ഷം ആളികത്തിക്കുന്നവരെ ജനം തള്ളും.1993 ല് മണിപ്പൂരില് തുടങ്ങിയ സംഘര്ഷം 5 കൊല്ലം തുടര്ന്നതും മോദി ഓര്പ്പിപ്പിച്ചു. കശ്മീരില് ഭീകരവാദത്തിനെതിരായ പോരാട്ടം അവസാന ഘട്ടത്തിലേക്ക് കടക്കുന്നുവെന്നും മോദി പാര്ലമെന്റിനെ അറിയിച്ചു.