നിയമസഭ കയ്യാങ്കളി കേസ്: പ്രതികളെല്ലാം ഇന്ന് കോടതിയിലെത്തും
തിരുവനന്തപുരം: നിയമസഭാ കയ്യാങ്കളി കേസില് പ്രതികളായ വിദ്യാഭ്യാസ മന്ത്രി വി ശിവന്കുട്ടി, എല്ഡിഎഫ് കണ്വീനര് ഇ പി ജയരാജന്, ഉള്പ്പെടെ ആറ് എല്ഡിഎഫ് നേതാക്കള് ഇന്ന് കോടതിയില് ഹാജരാകും. വിചാരണ ആരംഭിക്കുന്നതിന്റെ ഭാഗമായി കുറ്റപത്രം വായിച്ചു കേള്പ്പിക്കാന് പ്രതികളെല്ലാം ഹാജരാകണമെന്ന് തിരുവനന്തപുരം സിജെഎം കോടതി നേരത്തെ ഉത്തരവിട്ടിരുന്നു. വി ശിവന്കുട്ടി, ഇ പി ജയരാജന്, കെ ടി ജലീല് എംഎല്എ, കെ അജിത്, സി കെ സദാശിവന്, കെ കുഞ്ഞുമുഹമ്മദ് എന്നിവരാണ് പ്രതികള്.അഞ്ച് വര്ഷം വരെ തടവുശിക്ഷ ലഭിക്കാവുന്ന പൊതുമുതല് നശിപ്പിക്കല്, അതിക്രമിച്ച് കയറല്, നാശനഷ്ടങ്ങള് വരുത്തല് എന്നീ വകുപ്പുകളും പ്രതികള്ക്കെതിരെ ചുമത്തിയിട്ടുണ്ട്. വിചാരണ നടപടികളുടെ തീയതി കോടതിയും ഇന്ന് തീരുമാനിക്കും. 2015 മാര്ച്ച് 13ന് ബാര് കോഴക്കേസില് പ്രതിയായ കെ എം മാണിയുടെ ബജറ്റ് അവതരണം പ്രതിപക്ഷം തടസപ്പെടുത്തുന്നതിനിടെയാണ് സംഘര്ഷമുണ്ടായത്. സംഘര്ഷത്തിനിടെ 2.20 ലക്ഷം രൂപയുടെ പൊതുമുതല് നശിപ്പിച്ചുവെന്നാണ് ക്രൈം ബ്രാഞ്ചിന്റെ കുറ്റപത്രം. വിചാരണ നടപടി സ്റ്റേ ചെയ്യണമെന്ന വി ശിവന്കുട്ടിയുടെ ഹര്ജി ഹൈക്കോടതി തള്ളിയിരുന്നു. കേസ് പിന്വലിക്കാനായി സംസ്ഥാന സര്ക്കാര് സുപ്രീംകോടതിയെ വരെ സമീപിച്ചിരുന്നു. വിചാരണ നടപടികള് സ്റ്റേ ചെയ്യണമെന്ന് പ്രതികളുടെ ആവശ്യം കഴിഞ്ഞ ദിവസമാണ് ഹൈക്കോടതി തള്ളിയത്.വിചാരണ കോടതിയില് നേരിട്ട് ഹാജരാകുന്നത് ഒഴിവാക്കണമെന്ന വാദവും കോടതി അംഗീകരിച്ചില്ല. ഹൈക്കോടതിയിലെ വിടുതല് ഹര്ജിയില് വിധി വരുന്നത് വരെ വിചാരണ നടപടികള് സ്റ്റേ ചെയ്യണമെന്നാണ് ശിവന്കുട്ടി അടക്കമുള്ളവര് വാദിച്ചത്. സാങ്കേതികവാദങ്ങളുയര്ത്തി വിചാരണ നടപടികളില് നിന്ന് ഒഴിഞ്ഞുമാറരുതെന്ന് കുറ്റപത്രം വായിച്ച് കേള്ക്കുന്നതടക്കമുള്ള നടപടികള്ക്കായി ഹാജരാകണമെന്നുമായിരുന്നു കോടതിയുടെ നിലപാട്.