ക്ഷേത്ര ദര്ശനം കഴിഞ്ഞ് മടങ്ങിവരുന്ന കുടുംബാംഗങ്ങള് എന്ന വ്യാജേനയെ കഞ്ചാവ് കടത്താന് ശ്രമിച്ച ദമ്പതികള് ഉള്പ്പെടെ നാല് പേര് പിടിയില്
കൊല്ലം: കുഞ്ഞിനെ മറയാക്കി സംസ്ഥാനത്തേക്ക് കഞ്ചാവ് കടത്താന് ശ്രമിച്ച സംഘം കൊല്ലത്ത് പിടിയില്. 25 കിലോ കഞ്ചാവുമായി ദമ്പതികള് ഉള്പ്പെടെ നാല് പേരാണ് അറസ്റ്റിലായത്. ക്ഷേത്ര ദര്ശനം കഴിഞ്ഞ് മടങ്ങിവരുന്ന കുടുംബാംഗങ്ങള് എന്ന വ്യാജേനയാണ് വിശാഖപട്ടണത്ത് നിന്ന് പ്രതികള് കാറില് കഞ്ചാവ് കടത്തിയത്.വിശാഖപട്ടണത്ത് നിന്ന് കൊല്ലത്തേക്കാണ് കാറില് ദമ്പതികള് കഞ്ചാവ് കൊണ്ടുവന്നത്. രണ്ട് വയസുള്ള കുഞ്ഞിനെയും ഒപ്പം കൂട്ടിയായിരുന്നു കഞ്ചാവ് കടത്ത്. ദേശീയപാതയില് നീണ്ടകരയിലെ പെട്രോള് പമ്പില് വച്ച് പുലര്ച്ചെയാണ് കാര് പൊലീസ് തടഞ്ഞത്. കാറിനുള്ളില് വാതിലിന്റെ വശങ്ങളിലായിരുന്നു കഞ്ചാവ് പൊതികള് സൂക്ഷിച്ചത്. 20 പൊതികളിലായി 25 കിലോ കഞ്ചാവ് ഉണ്ടായിരുന്നു.
സ്ത്രീയും കുഞ്ഞും ഉള്ളതിനാല് പുറമെ നിന്ന് നോക്കിയാല് സംശയം തോന്നാത്ത രീതിയിലായിരുന്നു കഞ്ചാവ് കടത്തെന്ന് പൊലീസ് പറയുന്നു. കാറിനുള്ളില് ഉണ്ടായിരുന്ന ചിറയന്കീഴ് സ്വദേശി വിഷ്ണു, ഭാര്യ സൂര്യ, പെരിനാട് സ്വദേശി അഭയ് സാബു എന്നിവരാണ് അറസ്റ്റിലായത്.തിരുപ്പതി ക്ഷേത്രദര്ശനം കഴിഞ്ഞ മടങ്ങി വരുന്നുവെന്നാണ് പോലീസിന്റെ ആദ്യചോദ്യം ചെയ്യലില് പ്രതികള് പറഞ്ഞത്.കൊല്ലം ശാസ്ത്രീ ജംഗ്ഷനില് താമസിക്കുന്ന ഉണ്ണിക്കൃഷ്ണന് വേണ്ടിയാണ് ദമ്പതികള് കഞ്ചാവ് കൊണ്ടുവന്നതെന്ന് സ്ഥിരീകരിച്ചു. തുടര്ന്ന് ഉണ്ണികൃഷ്ണനെയും പൊലീസ് അറസ്റ്റ് ചെയ്തു. പ്രതികളുടെ സാമ്പത്തിക സ്ഥിതിയും മറ്റും പൊലീസ് വിശദമായി അന്വേഷിക്കുകയാണ്. ചവറ പൊലീസിന് പുറമേ സിറ്റി പൊലീസ് കമ്മിഷണറുടെ ഡാന്സാഫ് സ്ക്വാഡും കഞ്ചാവ് കടത്ത് പിടികൂടാന് ഉണ്ടായിരുന്നു.