യുവജന കമ്മീഷന് അധ്യക്ഷ ചിന്താ ജെറോമിന്റെ പേരില് വീണ്ടും വിവാദം.
കൊല്ലം: യുവജന കമ്മീഷന് അധ്യക്ഷയുടെ പേരില് വീണ്ടും വിവാദം. കൊല്ലത്തെ ഫോര് സ്റ്റാര് ഹോട്ടലില് ചിന്ത ജെറോം കുടുംബത്തോടൊപ്പം ഒന്നേമുക്കാല് വര്ഷം താമസിച്ചെന്നും, ഇവരുടെ സാമ്പത്തിക സ്രോതസ്സ് പരിശോധിക്കണമെന്നുമാണ് യൂത്ത് കോണ്ഗ്രസിന്റെ ആവശ്യം. അമ്മയുടെ ആയുര്വ്വേദ ചികിത്സയ്ക്കായി താമസിച്ചതാണെന്നാണ് ചിന്താ ജെറോമിന്റെ വിശദീകരണം.കൊല്ലം തങ്കശ്ശേരിയിലെ ഫോര് സ്റ്റാര് ഹോട്ടലില് മൂന്ന് മുറികളുള്ള അപാര്ട്മെന്റില് ചിന്താ ജെറോം ഒന്നേമുക്കാല് വര്ഷം താമസിച്ചെന്നാണ് യൂത്ത് കോണ്ഗ്രസിന്റെ ആരോപണം. പ്രതിദിനം എണ്ണായിരത്തി അഞ്ഞൂറ് രൂപയാണ് ഈ അപാര്ട്മെന്റിന്റെ വാടക. ഇക്കണക്കില് 38 ലക്ഷത്തോളം രൂപ ഹോട്ടലിന് ചിന്ത നല്കേണ്ടി വന്നുവെന്നും യൂത്ത് കോണ്ഗ്രസ് ആരോപിക്കുന്നു. ഇത്രയും പണം യുവജന കമ്മീഷന് അധ്യക്ഷക്ക് എങ്ങനെ കിട്ടി, ചിന്തയുടെ സാമ്പത്തിക സ്രോതസ് തുടങ്ങിയ കാര്യങ്ങള് അന്വഷിക്കണമെന്നാണ് ആവശ്യം. ഇക്കാര്യങ്ങള് ചൂണ്ടിക്കാട്ടി യൂത്ത് കോണ്ഗ്രസ് സംസ്ഥാന സെക്രട്ടറി വിഷ്ണു സുനില് പന്തളം, വിജിലന്സിനും എന്ഫോഴ്സ്മെന്റ് ഡയറക്ട്രേറ്റിലും പരാതി നല്കിയിട്ടുണ്ട്.