ലത മങ്കേഷ്കറിന് പ്രധാനമന്ത്രി അന്ത്യാഞ്ജലി അര്പ്പിക്കും
ന്യൂഡല്ഹി: സംഗീത ഇതിഹാസം ലത മങ്കേഷ്കറിന്റെ സംസ്കാരം ഇന്ന് വൈകുന്നേരം 6.30ന് നടക്കും. ഔദ്യോഗിക ബഹുമതികളോടെയാണ് സംസ്കാരം. പ്രധാനമന്ത്രി നരേന്ദ്രമോദി സംസ്കാര ചടങ്ങുകളില് പങ്കെടുക്കും. അദ്ദേഹം വൈകുന്നേരത്തോടെ മുംബൈയിലെത്തും. ഇന്ന് രാവിലെ ബ്രീച്ച് കാന്ഡി ആശുപത്രിയില് ചികിത്സയിലിരിക്കെയാണ് ലത മങ്കേഷ്കറിന്റെ അന്ത്യം.
മുംബൈയിലെ ബ്രീച്ച് കാന്ഡി ആശുപത്രിയില് നിന്നും മൃതദേഹം ദക്ഷിണ മുംബൈയിലെ പെദ്ദാര് റോഡിലുള്ള വസതിയിലെത്തിക്കും. അവിടുത്തെ പൊതു ദര്ശനത്തിന് ശേഷം ശിവാജി പാര്ക്കില് എത്തിയ്ക്കും. ശിവാജി പാര്ക്കിലെ പൊതുദര്ശനത്തില് പ്രധാനമന്ത്രി എത്തുമെന്നാണ് വിവരം. ലത മങ്കേഷ്കറുടെ കുടുംബവുമായി പ്രധാനമന്ത്രി സംസാരിക്കുകയും അനുശോചനം അറിയിക്കുകയും ചെയ്തിട്ടുണ്ട്.
ആരോഗ്യനില മോശമായതിനെ തുടര്ന്ന് കഴിഞ്ഞ ദിവസം വീണ്ടും വെന്റിലേറ്ററിലേക്ക് മാറ്റിയിരുന്നു. കൊറോണ ബാധിച്ചതിനെ തുടര്ന്ന് ജനുവരി എട്ടിനാണ് ലതമങ്കേഷ്കറിനെ ആശുപത്രിയില് പ്രവേശിപ്പിച്ചത്. പ്രിയഗായികയോടുള്ള ആദര സൂചകമായി രാജ്യം രണ്ട് ദിവസത്തെ ദുഃഖാചരണം നടത്തും. രണ്ട് ദിവസത്തേയ്ക്ക് ദേശീയ പതാക പകുതി താഴ്ത്തിക്കെട്ടും. ഔദ്യോഗിക വിനോദ പരിപാടികള് ഉണ്ടാകില്ല.