കെ ടി ജലീലിന്റെ പരാതിയില് പൊലീസ് എടുത്ത കേസ് റദ്ദാക്കണമെന്നാവശ്യപ്പെട്ട് സ്വപ്ന സുരേഷ് ഹൈക്കോടതിയെ സമീപിക്കും
കൊച്ചി;കെ ടി ജലീലിന്റെ പരാതിയില് കന്റോണ്മെന്റ് പൊലീസ് രജിസ്റ്റര് ചെയ്ത കേസ് റദ്ദാക്കണമെന്നാവശ്യപ്പെട്ട് സ്വപ്ന സുരേഷ് തിങ്കളാഴ്ച ഹൈക്കോടതിയെ സമീപിക്കും .കേസ് നിലനില്ക്കില്ലെന്ന് സ്വപ്ന വാദിക്കും.സ്വപ്നയും പി സി ജോര്ജും ചേര്ന്ന് ഗൂഡാലോചന നടത്തി, കലാപം ഉണ്ടാക്കാന് ശ്രമിച്ചു എന്നായിരുന്നു ജലീലിന്റെ പരാതി. ആദ്യം പരാതിയില് കേസെടുക്കാന് കഴിയുമോ എന്ന് പൊലീസ് സംശയിച്ചു. പിന്നീട് നിയമോപദേശത്തിന്റെ അടിസ്ഥാനത്തിലാണ് 120 ബി, 153 വകുപ്പുകള് പ്രകാരം കേസ് എടുത്തിരിക്കുന്നത്.
സ്വപ്നയ്ക്ക് എതിരെ ചുമത്തിയിരിക്കുന്നത് ജാമ്യം ലഭിക്കാവുന്ന കുറ്റങ്ങളെന്ന സര്ക്കാര് വാദം അംഗീകരിച്ച് മുന്കൂര് ജാമ്യ ഹര്ജി കോടതി ഇന്നലെ തള്ളിയിരുന്നു . അറസ്റ്റിനുള്ള സാഹചര്യം നിലവിലില്ല. ഹര്ജിയ്ക്ക് പിറകില് രാഷ്ട്രീയ താല്പ്പര്യമുണ്ടെന്നും സര്ക്കാര് ഹൈക്കോടതിയില് വ്യക്തമാക്കിയിരുന്നു. കെ ടി ജലീലിന്റെ പരാതിയില് രജിസ്റ്റര് ചെയ്ത കേസില് പൊലീസിന്റെ അറസ്റ്റ് ഭീഷണിയുണ്ടെന്ന് ചൂണ്ടിക്കാണിച്ചാണ് സ്വപ്നയും സരിത്തും ഹൈക്കോടതിയെ സമീപിച്ചത്.