ഹിജാബ് നിരോധനം ചോദ്യം ചെയ്തുള്ള ഹര്ജികള് കര്ണാടക ഹൈക്കോടതി തള്ളി.
ബെംഗളൂരു :ഹിജാബ് നിരോധനം ചോദ്യം ചെയ്തുള്ള ഹര്ജികള് കര്ണാടക ഹൈക്കോടതിയുടെ വിശാല ബെഞ്ച് തള്ളി. നാല് മാസത്തിലേറെ നീണ്ട പ്രതിഷേധങ്ങള്ക്കും സംഘര്ഷങ്ങള്ക്കുമൊടുവിലാണ് ഹിജാബ് കേസില് കര്ണാടക ഹൈക്കോടതി ഇന്ന് വിധി പറയുന്നത്. ഹൈക്കോടതി ചീഫ് ജസ്റ്റിസ് റിതുരാജ് അവസ്തിയുടെ നേതൃത്വത്തിലുള്ള വിശാല ബെഞ്ചാണ് ഹര്ജികള് തള്ളിയത്.കേസില് വിധി വരുന്നതിന്റെ പശ്ചാത്തലത്തില് ബെംഗളൂരു, മൈസൂരു, ബെളഗാവി എന്നിവിടങ്ങളില് ഒരാഴ്ച നിരോധനാജ്ഞ പ്രഖ്യാപിച്ചു. പ്രകടനങ്ങള്ക്കും ആളുകള് ഒത്തുചേരുന്നതിനും നിരോധനമുണ്ട്. ഉഡുപ്പി, ശിവമൊഗ്ഗ എന്നിവിടങ്ങളിലടക്കം വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു.
ഉഡുപ്പിയിലെ സര്ക്കാര് കോളേജില് തുടങ്ങിയ എതിര്പ്പാണ് രാജ്യവ്യാപക പ്രതിഷേധങ്ങള്ക്ക് വഴിമാറിയത്. ഹിജാബ് അനുവദിക്കാത്തിന്റെ പേരില് 250 ഓളം വിദ്യാര്ത്ഥിനികളാണ് ഇതുവരെ പരീക്ഷ ബിഹിഷ്കരിച്ചത്. ഒരു കാരണവശാലും വിദ്യാഭ്യാസ സ്ഥാപനങ്ങളില് മതാചാര വസ്ത്രങ്ങള് അനുവദിക്കില്ലെന്ന ഉറച്ച നിലപാടിലാണ് സര്ക്കാര്.
ഉഡുപ്പി പിയു കോളേജില് ഹിജാബ് ധരിച്ചെത്തിയ ആറ് വിദ്യാര്ത്ഥിനികളെ തടഞ്ഞതോടെയാണ് വിവാദങ്ങളുടെ തുടക്കം. കാലങ്ങളായി ഹിജാബും ബുര്ഖയും മാറ്റിയ ശേഷമേ വിദ്യാര്ത്ഥിനികളെ അനുവദിച്ചിരുന്നുള്ളൂവെന്ന് കോളേജ് അധികൃതര് നിലപാട് സ്വീകരിച്ചതോടെ പ്രതിഷേധം കടുത്തു. വിദ്യാര്ത്ഥിനികള്ക്ക് പിന്തുണയുമായി കൂടുതല് സംഘടനകള് രംഗത്ത്. പിന്നാലെ മംഗ്ലൂരുവിലും മാണ്ഡ്യയിലും സര്ക്കാര് കോളേജുകളില് ഹിജാബ് ധരിച്ചെത്തിയവരെ തടഞ്ഞു. കാവി ഷാള് ധരിച്ച് മറ്റൊരു വിഭാഗം വിദ്യാര്ത്ഥികളും കോളേജുകളിലേക്ക് എത്തിയതോടെ പ്രതിഷേധം സംഘര്ഷങ്ങള്ക്ക് വഴിമാറി. പ്രതിഷേധം തെരുവകളിലേക്ക് വ്യാപിച്ചു.