ദിലീപിന്റെ ശബ്ദം വ്യാസന് എടവനക്കാട് തിരിച്ചറിഞ്ഞു
കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ കൊല്ലാന് ഗൂഢാലോചന നടത്തിയെന്ന കേസിലെ ദിലീപ് ഉള്പ്പെടെ പ്രതികളുടെ ചോദ്യം ചെയ്യലിനിടെ തന്നെ വിളിച്ചു വരുത്തിയത് പ്രതികളുടെ ശബ്ദരേഖ തിരിച്ചറിയാന് വേണ്ടിയാണെന്ന് സംവിധായകനും തിരക്കഥാകൃത്തുമായ വ്യാസന് എടവനക്കാട്.ദിലീപടക്കം എല്ലാവരുടെയും ശബ്ദം തിരിച്ചറിഞ്ഞു. വര്ഷങ്ങളായി അടുപ്പം ഉള്ളവരാണ് എല്ലാവരുമെന്ന് വ്യാസന് എടവനക്കാട് പറഞ്ഞു.ബാലചന്ദ്ര കുമാര് നല്കിയ ശബ്ദ സാമ്പിളില് നിന്നാണ് ദിലീപിന്റെ ശബ്ദം വ്യാസന് തിരിച്ചറിഞ്ഞത്.
നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ കൊല്ലാന് ഗൂഡാലോചന നടത്തിയെന്ന കേസില് ദിലീപിനെ ചോദ്യം ചെയ്യുന്നതിനിടെ ഇന്നലെ സംവിധായകന് റാഫിയെ വിളിച്ചുവരുത്തിയതും ദിലീപിന്റെ ശബ്ദം തിരിച്ചറിയാന് ആയിരുന്നു. ബാലചന്ദ്ര കുമാര് നല്കിയ ശബ്ദ സാമ്പിളില് നിന്ന് ദിലീപിന്റെ ശബ്ദം റാഫി തിരിച്ചറിഞ്ഞിരുന്നു. എസ്പിയുടെ ക്യാബിനില് വച്ച് എല്ലാ ശബ്ദരേഖയും പ്രതികളെ കേള്പ്പിച്ചിരുന്നു. ഇവരുടെ ശബ്ദം തന്നെയാണോ ഇതിലുള്ളതെന്നും ആരാഞ്ഞു. ഇതിനുശേഷമാണ് തിരിച്ചറിയാന് അതുമായി ബന്ധപ്പെട്ടവരെ വിളിച്ചുവരുത്തിയത്.