എകെജി സെന്റര് ആക്രമണം ജിതിന്റെ അറസ്റ്റ് രേഖപ്പെടുത്തി
തിരുവനന്തപുരം: എകെജി സെന്റര് ആക്രമണകേസില് കസ്റ്റഡിയിലുള്ള യൂത്ത് കോണ്ഗ്രസ് പ്രവര്ത്തകന് മണ്വിള സ്വദേശി ജിതിന്റെ അറസ്റ്റ് ക്രൈംബ്രാഞ്ച് രേഖപ്പെടുത്തി. എകെജി സെന്റര് ആക്രമണകേസില് ഇന്ന് രാവിലെയാണ് ക്രൈംബ്രാഞ്ച് ജിതിനെ കസ്റ്റഡിയിലെടുത്തത് . സ്ഫോടക വസ്തു എറിഞ്ഞ ശേഷം ഡിയോ സ്കൂട്ടറില് ഗൗരീശ പട്ടത്തെത്തിയ ജിതിന് കാറില് കയറിയാണ് രക്ഷപ്പെട്ടതെന്ന് ക്രൈബ്രാഞ്ച് സ്ഥിരീകരിച്ചു.ഡിയോ സ്കൂട്ടര് ഗൗരീശ പട്ടം വരെ ജിതിന് ഓടിച്ചുപോയ സിസിടിവി ദൃശ്യങ്ങള് ലഭിച്ചു. അതിന് ശേഷം മറ്റൊരാളാണ് ഈ വാഹനം ഓടിക്കുന്നത്. സ്കൂട്ടറിന് പിന്നില് ഗൗരീശ പട്ടം മുതല് ഒരു കാറാണുള്ളത്. സിസിടിവി പരിശോധിച്ചപ്പോള് ഇത് കെഎസ്ഇബിയുടെ ബോര്ഡ് വെച്ച കാറാണെന്ന് കണ്ടെത്തി. തുടര്ന്ന് നടത്തിയ അന്വേഷണത്തില് കാര് ജിതിന്റെ ഉടമസ്ഥതയിലുള്ളതാണെന്നും ക്രൈംബ്രാഞ്ച് കണ്ടത്തി. കാറിന്റെ ഡിക്കിയും അസാധാരണമായ നിലയില് തുറന്നിരിക്കുകയായിരുന്നുവെന്നും സിസിടിവിയിലുണ്ടെന്നാണ് ക്രൈംബ്രാഞ്ച് വ്യത്തങ്ങളില് നിന്നും ലഭിക്കുന്ന വിവരം. എകെജി സെന്ററിന് മുന്നിലെ സിസിടിവി ദൃശ്യങ്ങള് ഒരു സ്വകാര്യ ലാബില് അയച്ച് പരിശോധിച്ചതില് നിന്നും ഇയാള് ധരിച്ച ടീഷര്ട്ടിനെ കുറിച്ചും വിവരം ലഭിച്ചു. അന്വേഷണത്തില് തലസ്ഥാനത്ത് ഈ ബ്രാന്ഡിലെ 12 ടീഷര്ട്ടുകള് വിറ്റുപോയെന്ന് വ്യക്തമായി. ഇത് പരിശോധിച്ചപ്പോള് ഇവയില് ഒരു ടീഷര്ട്ട് വാങ്ങിയത് ജിതിന് ആണെന്നും വ്യക്തമായി. സ്ഫോടക വസ്തുവുമായി ജിതിനെത്തിയത് ഡിയോ സ്കൂട്ടറിലാണ്. അതിന് ശേഷം സ്കൂട്ടര് പിന്നീട് ഓടിച്ചു പോയത് മറ്റൊരാളാണ്. കേസുമായി ബന്ധപ്പെട്ട് ചോദ്യം ചെയ്യലിനായി വിളിപ്പിച്ചപ്പോള് ഫോണിലെ വിശദാംശങ്ങള് എല്ലാം മാറ്റിയ ശേഷമാണ് ജിതിനെത്തിയതെന്നും ക്രൈം ബ്രാഞ്ച് അന്വേഷണ സംഘം അറിയിച്ചു. യൂത്ത് കോണ്ഗ്രസ് ആറ്റിപ്ര മണ്ഡലം പ്രസിഡന്റാണ് പിടിയിലായ ജിതിന്. ഇയാളെ കവടിയാറിലെ ക്രൈംബ്രാഞ്ച് ഓഫീസില് കൂടുതല് ചോദ്യം ചെയ്യുകയാണ്.