ഇലന്തൂരിലെ നരബലി അന്വേഷണത്തിന് പ്രത്യേക സംഘത്തെ രൂപീകരിച്ചു
കൊച്ചി : നാടിനെ നടുക്കിയ അരുംകൊലയായി നരബലി കേസിന്റെ അന്വേഷണത്തിന് പൊലീസ് പ്രത്യേക സംഘത്തെ രൂപീകരിച്ചു. പത്മ, റോസ്ലി എന്നീ സ്ത്രീകളുടെ കൊലപാതകവുമായി ബന്ധപ്പെട്ട് കടവന്ത്ര, കാലടി പൊലീസ് സ്റ്റേഷനുകളില് രജിസ്റ്റര് ചെയ്ത കേസുകള് അന്വേഷിക്കുന്നതിനാണ് പ്രത്യേക അന്വേഷണ സംഘത്തെ രൂപീകരിച്ചത്. കൊച്ചി സിറ്റി ഡെപ്യൂട്ടി പൊലീസ് കമ്മീഷണര് എസ് ശശിധരനാണ് പ്രത്യേക അന്വേഷണ സംഘത്തിന്റെ തലവന്. പെരുമ്പാവൂര് എഎസ്പി അനൂജ് പാലിവാള് മുഖ്യ അന്വേഷണ ഉദ്യോഗസ്ഥനായിരിക്കും. എറണാകുളം സെന്ട്രല് അസിസ്റ്റന്റ് കമ്മീഷണര് സി ജയകുമാര്, കടവന്ത്ര സ്റ്റേഷന് ഹൗസ് ഓഫീസര് ബൈജു ജോസ്, കാലടി സ്റ്റേഷന് ഹൗസ് ഓഫീസര് അനൂപ് എന്എ എന്നിവര് അന്വേഷണ ഉദ്യോഗസ്ഥരും എളമക്കര പൊലീസ് സ്റ്റേഷനിലെ സബ്ബ് ഇന്സ്പെക്ടര് എയിന് ബാബു, കാലടി പൊലീസ് സ്റ്റേഷനിലെ സബ്ബ് ഇന്സ്പെക്ടര് ബിപിന്.ടി.ബി എന്നിവര് അംഗങ്ങളുമാണ്. ക്രമസമാധാന വിഭാഗം എഡിജിപിയുടെ നേരിട്ടുളള മേല്നോട്ടത്തിലായിരിക്കും അന്വേഷണസംഘം പ്രവര്ത്തിക്കുക. നരബലി കേസില് അരുംകൊല ആസൂത്രണം ചെയ്ത മുഖ്യപ്രതി മുഹമ്മദ് ഷാഫി, ഭഗവല് സിംഗ്, ഭാര്യ ലൈല എന്നിവരെ അറസ്റ്റ് ചെയ്യുകയും കോടതി രണ്ടാഴ്ചത്തേക്ക് റിമാന്ഡ് ചെയ്തു. പത്മയെ ഷാഫിയും റോസ്ലിയെ ലൈലയും ചേര്ന്നാണ് കൊലപ്പെടുത്തിയത്. റോസ്ലിയുടെ കഴുത്തറത്ത് കൊലപ്പെടുത്തിയ ശേഷം ഭഗവല് സിംഗ് മാറിടം മുറിച്ചുമാറ്റിയെന്നുമാണ്പൊലീസ് റിമാന്ഡ് റിപ്പോര്ട്ട്.