അയല്‍വാസി തോക്കുമായി വീട്ടിലെത്തി ഭീഷണിപ്പെടുത്തിയതായി പരാതി
ശാന്തന്‍പാറ: അയല്‍വാസി തോക്കുമായി വീട്ടിലെത്തി ഭീഷണിപ്പെടുത്തിയതായി വീട്ടമ്മയുടെ പരാതി. ചിന്നക്കനാലിന് സമീപം സിങ്കുകണ്ടത്ത് സംഭവം.ചിന്നക്കനാല്‍ പഞ്ചായത്ത് ഒമ്പതാം വാര്‍ഡിലെ താമസക്കാരിയായ സിങ്കുകണ്ടം സ്വദേശി ലിസിയാണ് ശാന്തന്‍പോറ പൊലീസില്‍ പരാതി നല്‍കിയത്. സിങ്കുകണ്ടത്തുള്ള കൂനംമാക്കല്‍ വര്‍ഗീസാണ് (വര്‍ക്കി)യാണ് ഭീഷണിപ്പെടുത്തിയത്. 
ലിസിയും സഹോദരിയുടെ മകനുമാണ് സംഭവ സമയത്ത് വീട്ടിലുണ്ടായിരുന്നത്. വര്‍ഗീസും ലിസിയും തമ്മില്‍ സ്ഥല സംബന്ധമായ പ്രശ്‌നങ്ങളുണ്ടായിരുന്നു. വര്‍ഗീസ്, തോക്കുമായി വീട്ടിലെത്തി സ്ഥലം അയാളുടെതാണെന്നും വീട്ടില്‍ നിന്ന് ഇറങ്ങിപ്പോകണമെന്നും ആവശ്യപ്പെട്ടതായി ലിസി പറഞ്ഞു. സഹോദരന്റെ മകന്റെ സഹായത്തോടെ ഇയാളെ വീട്ടില്‍ നിന്നും ഇറക്കിവിട്ട ശേഷം വനം വകുപ്പ് ഉദ്യോഗസ്ഥരെ വിവരമറിയിക്കുകയായിരുന്നുവെന്നും ലിസി കൂട്ടിച്ചേര്‍ത്തു.സംഭവം അറിഞ്ഞ് വനം വകുപ്പ് ഉദ്യോഗസ്ഥര്‍ വര്‍ഗീസിന്റെ വീട്ടില്‍ പരിശോധന നടത്തിയെങ്കിലും തോക്ക് കണ്ടെത്താന്‍ കഴിഞ്ഞിട്ടില്ല. യഥാര്‍ത്ഥ തോക്കല്ല തന്റെ പക്കലുണ്ടായിരുന്നതെന്നാണ് വര്‍ഗീസ് പൊലീസിനോട് പറഞ്ഞത്. ഇരുവരും തമ്മില്‍ ഇടക്കിടെ വഴക്കുണ്ടാകാറുണ്ടെന്നാണ് പൊലീസ് പറയുന്നത്. സംഭവം സംബന്ധിച്ച് ശാന്തന്‍പാറ പൊലീസ് അന്വേഷണം തുടങ്ങി.
