കേന്ദ്ര മന്ത്രി രാജ്നാഥ് സിംഗ് സൈനിക മേധാവി ജനറല് ബിപിന് റാവത്തിന്റെ ഔദ്യോഗിക വസതിയില്
കേന്ദ്ര മന്ത്രി രാജ്നാഥ് സിംഗ് സംയുക്ത സൈനിക മേധാവി ജനറല് ബിപിന് റാവത്തിന്റെ ഔദ്യോഗിക വസതിയിലെത്തി.സൈനിക ഉദ്യോഗസ്ഥരുമായി ബന്ധപ്പെട്ട അപകടങ്ങള് നടന്നാല് കുടുംബത്തെ അറിയിക്കുക എന്നതാണ് കീഴ്വഴക്കം. ഇതിന്റെ ഭാഗമായാണ് രാജ്നാഥ് സിംഗ് ബിപിന് റാവത്തിന്റെ വസതിയിലെത്തി കുടുംബാംഗങ്ങളെ കണ്ടത്. ബിപിന് റാവത്തിന്റെ ഔദ്യോഗിക വസതിക്ക് മുന്പില് സുരക്ഷ ശക്തമാക്കിയിട്ടുണ്ട്.പ്രതിരോധ മന്ത്രി രാജ്നാഥ് സിംഗിന്റെ പ്രസ്താവന ഇന്ന് ഉണ്ടാകില്ല. ഇന്ത്യന് വ്യോമസേനയുടെ ഹെലികോപ്റ്റര് അപകടവുമായി ബന്ധപ്പെട്ട് ഇന്ന് പാര്ലമെന്റില് രാജ് നാഥ് സിംഗ് പരസ്യ പ്രസ്താവന നടത്തുമെന്നായിരുന്നു ആദ്യം പുറത്ത് വന്ന വിവരം. എന്നാല് പരുക്കേറ്റവരുടെ ആരോഗ്യ നില സംബന്ധിച്ച പൂര്ണ വിവരങ്ങള് ലഭ്യമായ ശേഷം മാത്രം പ്രസ്താവന നടത്താമെന്ന തീരുമാനത്തില് എത്തുകയായിരുന്നു.ഇന്ത്യന് വ്യോമ സേനയുടെ ഹെലികോപ്റ്റര് തകര്ന്നുണ്ടായ അപകടത്തില് മരണസംഖ്യ പതിനൊന്നായെന്നാണ് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്. പതിനൊന്ന് മൃതദേഹങ്ങള് സംഭവസ്ഥലത്ത് നിന്ന് കൊണ്ടുപോയെന്നാണ് തമിഴ്നാട്ടിലെ പ്രാദേശിക മാധ്യമങ്ങള് പറയുന്നു.
MI 17v5 എന്ന ഹെലികോപ്റ്ററാണ് അപകടത്തില്പ്പെട്ടത്. തമിഴ്നാട്ടിലെ ഊട്ടി കന്നേരിക്ക് സമീപമാണ് ഹെലികോപ്റ്റര് പറക്കുന്നതിനിടെ തകര്ന്ന് വീണത്. ഹെലികോപ്റ്റര് പൂര്ണമായും കത്തി നശിച്ചിട്ടുണ്ട്. നിബിഡ വനത്തിലാണ് ഹെലികോപ്റ്റര് തകര്ന്ന് വീണത്. സംയുകിത സൈനിക മേധാവി ബിപിന് റാവത്തും കുടുംബവും അടക്കം 14 പേരാണ് ഹെലികോപ്റ്ററില് ഉണ്ടായിരുന്നു എന്നാണ് എഎന്ഐ റിപ്പോര്ട്ട് ചെയ്യുന്നത്. ഇതില് ഉന്നത ഉദ്യോഗസ്ഥരും ഉള്പ്പെടുന്നു. അഞ്ച് പേര് ബിപിന് റാവത്തിന്റെ പേഴ്സണല് സ്റ്റാഫ് അംഗങ്ങളാണ്.ജനറല് ബിപിന് റാവത്ത്, ഭാര്യ മധുലിക റാവത്ത്, ബ്രിഗേഡിയര് എല്എസ് ലിഡ്ഡര്, ലഫ്റ്റ്നന്റ് കേണല് ഹജീന്ദര് സിങ്ങ്, നായിക് ഗുര്സേവക് സിങ്ങ്, നായിക് ജിതേന്ദ്ര കുമാര്, ലാന്സ് നായിക് വിവേക് കുമാര്, ലാന്സ് നായിക് സായി തേജ, ഹവില്ദാര് സത്പാല് എന്നിവര് ഹെലികോപ്റ്ററില് ഉണ്ടായിരുന്നുവെന്നാണ് സ്ഥിരീകരണം.