ഹിമാചലില് ആറ് എംഎല്എമാരെ സ്പീക്കര് അയോഗ്യരാക്കി
ദില്ലി: ഹിമാചല്പ്രദേശില് വിപ്പ് ലംഘിച്ച് ബിജെപിക്ക് വോട്ട് ചെയ്ത ആറ് കോണ്ഗ്രസ് എംഎല്എമാരെയും കൂറുമാറ്റ നിരോധന നിയമപ്രകാരം സ്പീക്കര് അയോഗ്യരാക്കി. ബാക്കിയുള്ള എംഎല്എമാരെ കൂടെ നിര്ത്താന് മുഖ്യമന്ത്രി സുഖ്വിന്ദര് സിങ് സുഖു ഷിംലയില് യോഗം വിളിച്ച് ചേര്ത്തു. എഐസിസി നിരീക്ഷകര് കോണ്ഗ്രസ് അധ്യക്ഷന് ഇന്ന് റിപ്പോര്ട്ട് നല്കും. പാര്ട്ടി നല്കിയ വിപ്പ് ലംഘിച്ച് ധനബില് പാസാക്കുമ്പോള് അടക്കം വിട്ടുനിന്നുവെന്ന കാരണം ചൂണ്ടിക്കാട്ടിയാണ് 6 കോണ്ഗ്രസ് എംഎല്എമാരെയും സ്പീക്കര് അയോഗ്യരാക്കിയത്. എംഎല്എമാരില് നിന്ന് ഇന്നലെ വിശദീകരണം തേടിയ ശേഷമാണ് സ്പീക്കര് കുല്ദീപ് സിങ് പഠാനിയയുടെ നടപടി. മറുപടി നല്കാന് ഏഴ് ദിവസത്തെ സാവകാശം വേണമെന്ന് വിമതര് ആവശ്യപ്പെട്ടിരുന്നുവെങ്കിലും അനുവദിച്ചിരുന്നില്ല. ഇതോടെ ബിജെപിക്ക് ഒപ്പമുള്ള എംഎല്എമാരുടെ എണ്ണം 34 ല് നിന്ന് 28 ആയി കുറഞ്ഞു.രാജ്യസഭ തെരഞ്ഞെടുപ്പില് മൂന്ന് സ്വതന്ത്രരരും ആറ് വിമതരം ബിജെപിക്ക് അനുകൂലമായി വോട്ട് ചെയ്തതാണ് കോണ്ഗ്രസ് സ്ഥാനാര്ത്ഥിയുടെ തോല്വിക്ക് കാരണമായത്. പാര്ട്ടി എംഎല്എമാര് അയോഗ്യരായത് കോണ്ഗ്രസിന്റെ അംഗസംഖ്യ കേവല ഭൂരിപക്ഷമായ 35ന് താഴെയെത്തിക്കുകയും ചെയ്തിട്ടുണ്ട് . നിയമസഭയുടെ അംഗസംഖ്യ കുറഞ്ഞതിനാല് തല്ക്കാലം സര്ക്കാരിന് പിടിച്ചു നില്ക്കാം. വിമതരെ അനുനയിപ്പിക്കാനുള്ള നീക്കം പരാജയപ്പെട്ടതോടെയാണ് കടുത്ത നടപടിയിലേക്ക് കോണ്ഗ്രസ് കടന്നത്.