മമ്മൂട്ടിയുടെ സേതുരാമയ്യര്‍ സിബിഐ അഞ്ചാം ഭാഗം വരുന്നു
മലയാളികള്‍ക്ക് ഏറ്റവും ഇഷ്ടമുള്ള മമ്മൂട്ടി കഥാപാത്രങ്ങളില്‍ ഒന്നാണ് സിബിഐ ഓഫിസര്‍ സേതുരാമയ്യരുടെ. ഇന്‍വെസ്റ്റിഗേഷന്‍ ത്രില്ലറായി പുറത്തിറങ്ങിയ ചിത്രങ്ങളെല്ലാം സൂപ്പര്‍ഹിറ്റുകളായിരുന്നു. ഏറെ നാളായി ചിത്രത്തിന്റെ അഞ്ചാം ഭാഗത്തെക്കുറിച്ചുള്ള ചര്‍ച്ചകള്‍ സജീവമായിരുന്നു. ഇപ്പോള്‍ ചിത്രത്തിന്റെ ഷൂട്ടിങ് ആരംഭിക്കാന്‍ ഒരുങ്ങുന്നതായാണ് പുറത്തുവരുന്ന റിപ്പോര്‍ട്ടുകള്‍. കൊവിഡ് സാഹചര്യം അനുകൂലമെങ്കില്‍ മലയാളമാസം ചിങ്ങം ഒന്നിന് (ഓഗസ്റ്റ് 17) സിനിമയുടെ ചിത്രീകരണം ആരംഭിക്കുമെന്നാണ് അണിയറ പ്രവര്‍ത്തകര്‍ പറയുന്നത്. മുന്‍ ഭാഗങ്ങളിലേതു പോലെ മമ്മൂട്ടിയുടെ സേതുരാമയ്യര്‍ക്കും മുകേഷിന്റെ ചാക്കോയുമായിരിക്കും പ്രധാന കഥാപാത്രങ്ങളാവുക. പൊലീസ് ഉദ്യോഗസ്ഥനായ സായ് കുമാറിനെ കൂടാതെ രണ്‍ജി പണിക്കര്‍, സൗബിന്‍ ഷാഹിര്‍, ആശ ശരത്ത് തുടങ്ങിയവരും ചിത്രത്തില്‍ അഭിനയിക്കും.
നാല് വര്‍ഷം മുന്‍പാണ് സിബിഐ സിരീസില്‍ അഞ്ചാമതൊരു ചിത്രത്തിന്റെ ആലോചനയെക്കുറിച്ച് സംവിധായകന്‍ കെ മധു ആദ്യമായി സൂചന തരുന്നത്. പിന്നീട് പലപ്പോഴായി അദ്ദേഹവും ചിത്രത്തിന്റെ തിരക്കഥാകൃത്തായ എസ് എന്‍ സ്വാമിയും ചിത്രത്തെക്കുറിച്ച് പറഞ്ഞിരുന്നു.
ഇപ്പോള്‍ അപ്രതീക്ഷിതമായാണ് ചിത്രത്തിന്റെ ഷൂട്ടിങ്ങിനെക്കുറിച്ച് റിപ്പോര്‍ട്ടുകള്‍ വരുന്നത്. സിരീസിലെ ആദ്യചിത്രം ഒരു സിബിഐ ഡയറിക്കുറിപ്പ് 1988ലാണ് ഇറങ്ങിയത്.പിന്നീട് 1989ല്‍ ജാഗ്രത, 2004ല്‍ സേതുരാമയ്യര്‍ സിബിഐ, 2005ല്‍ നേരറിയാന്‍ സിബിഐ എന്നീ ചിത്രങ്ങളും പുറത്തെത്തി.
