എലികളുടെ ശല്യം അതിരൂക്ഷം; ഇന്ത്യയില് നിന്നും ‘എലി വിഷം’ വാങ്ങാനൊരുങ്ങി ഓസ്ട്രേലിയ
ഓസ്ട്രേലിയയില് എലികളുടെ ശല്യം അതിരൂക്ഷമായതിനെ തുടര്ന്ന് ഇന്ത്യയില് നിന്നും ‘എലി വിഷം’ വാങ്ങാനൊരുങ്ങി സര്ക്കാര്. ഓസ്ട്രേലിയയിലെ ന്യൂ സൗത്ത് വെയില്സ് സംസ്ഥാനത്ത് എലികളുടെ ശല്യം വര്ദ്ധിച്ചതോടെ ഇന്ത്യയില് നിന്നും 5,000 ലിറ്റര് എലിവിഷം ഇറക്കുമതി ചെയ്യും. കൊറോണക്കാലത്ത് പ്ലേഗ് ഭീതി ഉണ്ടാക്കുന്ന തരത്തിലാണ് ന്യൂ സൗത്ത് വെയില്സ് റൂറല് മേഖലയില് എലിശല്യം വര്ദ്ധിക്കുന്നത്. ഇത് സംബന്ധിച്ച് വീഡിയോകളും ചിത്രങ്ങളും വൈറലായതിന് പിന്നാലെയാണ് ഇത് വലിയ ചര്ച്ചയായി മാറിയത്. ഇത്രയും എലികളെ കൂട്ടത്തോടെ 24 മണിക്കൂറില് കൊലപ്പെടുത്താന് കഴിയുന്ന ഒരു മരുന്ന് ലോകത്ത് വേറെയില്ലെന്നാണ് പറയുന്നത്. എന്നാല് ബ്രോമാഡിയോലോണ് എന്ന വിഷമാണ് എലികളെ നശിപ്പിക്കാന് ഇന്ത്യയില് നിന്നും ഓസ്ട്രേലിയ ഇറക്കുമതി ചെയ്യാനിരിക്കുന്നത്. എലികളെ കാര്പ്പറ്റ് ബോംബിംഗ് ചെയ്ത് കൊലപ്പെടുത്താന് ശേഷിയുള്ള അര്ത്ഥത്തില് ‘എലികളുടെ നാപാം’ എന്നാണ് ഈ എലിവിഷത്തെ വിശേഷിപ്പിക്കുന്നത്.