ഗോള്വാള്ക്കര്ക്കെതിരായ പ്രസ്താവന; വി ഡി സതീശന് കോടതിയുടെ നോട്ടീസ്
തിരുവനന്തപുരം: ആര്എസ്എസ് ആചാര്യന് എം എസ് ഗോള്വാള്ക്കര്ക്കെതിരെ പ്രസ്താവന നടത്തിയതിന് വി ഡി സതീശന് കോടതി നോട്ടീസ്. കണ്ണൂര് പ്രിന്സിപ്പല് മുന്സിഫ് കോടതിയുടേതാണ് നോട്ടീസ്. അടുത്ത മാസം 12 ന് ഹാജരാകാനാണ് നോട്ടീസിലെ നിര്ദേശം. ആര് എസ് എസിന്റെ പ്രാന്ത സംഘ ചാലക് കെ.കെ. ബാലറാമാണ് കേസ് ഫയല് ചെയ്തത്. ആര്എസ്എസ് ആചാര്യനായ ഗോള്വാള്ക്കറിന്റെ വിചാരധാര എന്ന പുസ്തകത്തില് ഭരണഘടന സംബന്ധിച്ച് സജി ചെറിയാന് പറഞ്ഞ അതേവാക്കുകള് കൃത്യമായി പറഞ്ഞിട്ടുണ്ടെന്നായിരുന്നു പ്രതിപക്ഷ നേതാവിന്റെ പ്രതികരണം. ഇത് ഏറ്റുപിടിച്ച് ആര്എസ്എസ് വി ഡി സതീശന് നോട്ടീസ് അയച്ചിരുന്നു. സജി ചെറിയാന് പറഞ്ഞ അതേവാക്കുകള് വിചാരധാരയില് എവിടെയാണെന്ന് അറിയിക്കണം. അതിന് കഴിഞ്ഞില്ലെങ്കില് പ്രസ്താവന പിന്വലിക്കണം. ഇല്ലെങ്കില് നിയമനടപടി സ്വീകരിക്കുമെന്നായിരുന്നു ആര്എസ്എസ് അയച്ച നോട്ടീസിലുള്ളത്.