സംസ്ഥാനത്ത് ഇന്ന് 11,801 സര്ക്കാര് ജീവനക്കാര് സര്വ്വീസില് നിന്ന് പടിയിറങ്ങുന്നു
സംസ്ഥാനത്ത് ഇന്ന് സര്ക്കാര് ജീവനക്കാരുടെ കൂട്ട വിരമിക്കല്.11,801 പേരാണ് സര്ക്കാര് സര്വ്വീസില് നിന്ന് ഇന്ന് പടിയിറങ്ങുന്നത്. ആരോഗ്യം, വിദ്യാഭ്യാസം, റവന്യു വകുപ്പുകളില് നിന്നാണ് കൂടുതല് പേരും വിരമിക്കുന്നത്. ഈ വര്ഷം ആകെ വിരമിക്കുന്നത് 21,537 പേരാണ്. അതില് പകുതിയിലേറെ പേരാണ് സര്ക്കാര് സര്വ്വീസില് നിന്ന് ഇന്ന് ഒരുമിച്ച് പടിയിറങ്ങുന്നത്.
സംസ്ഥാനത്ത് സ്കൂള് പ്രവേശനം മുന്നില് കണ്ട് മെയ് മാസം ജനന തീയതി രേഖപ്പെടുത്തുന്ന പതിവുണ്ടായിരുന്നതിനാലാണ് ഇത്രയധികം പേരുടെ കൂട്ടവിരമിക്കല് ഈ ദിവസമുണ്ടായത്. വകുപ്പുകളിലെ വിവിധ തസ്തികയനുസരിച്ച് 15 മുതല് 80 ലക്ഷം രൂപ വരെ നല്കേണ്ടതിനാല് 1500 കോടിയോളം രൂപ സര്ക്കാര് കണ്ടെത്തേണ്ടിവരും. എന്നാല് ഇവര്ക്ക് ആനുകൂല്യങ്ങള് നല്കാന് തടസ്സമില്ലെന്നും തുക തടഞ്ഞുവെക്കുന്ന സാഹചര്യം ഉണ്ടാകില്ലെന്നും സംസ്ഥാന ധനവകുപ്പ് അറിയിച്ചു.അതേസമയം കേരളാ പോലീസില് നിന്നും 3 ഡിജിപിമാര് ബുധനാഴ്ച്ച വിരമിക്കും. ഫയര്ഫോഴ്സ് മേധാവി ബി.സന്ധ്യ, എക്സൈസ് കമ്മീഷണര് ആര്.ആനന്ദകൃഷ്ണന്, എസ്പിജി ഡയറക്ടറായ കേരള കേഡര് ഡിജിപി അരുണ്കുമാര് സിന്ഹ എന്നിവരാണ് വിരമിക്കുന്നത്. ഇവര്ക്ക് ഇന്ന് പ്രത്യേക യാത്രയയപ്പ് നല്കും. ഇന്നലെ 9 എസ്പിമാര്ക്ക് പോലീസ് ആസ്ഥാനത്ത് യാത്രയയപ്പ് നല്കിയിരുന്നു.