വ്ളോഗര് റിഫ മെഹ്നുവിന്റെ മരണം; മൃതദേഹം പുറത്തെടുത്ത് പോസ്റ്റ്മോര്ട്ടം നടത്തും
കോഴിക്കോട്: ദുബായില് മരിച്ച നിലയില് കണ്ടെത്തിയ വ്ളോഗര് റിഫ മെഹ്നുവിന്റെ മരണവുമായി ബന്ധപ്പെട്ട കേസില് മൃതദേഹം പുറത്തെടുത്ത് പോസ്റ്റുമോര്ട്ടം ചെയ്യും.
ഇതിനായി അന്വേഷണ സംഘം ആര്ഡിഒയ്ക്ക് അപേക്ഷ നല്കി.
ദുബായില്വെച്ച് റിഫയുടെ പോസ്റ്റുമോര്ട്ടം നടത്തിയെന്ന് പറഞ്ഞ് ഭര്ത്താവും സുഹൃത്തുക്കളും കബളിപ്പിച്ചതായി കുടുംബം ആരോപിച്ചിരുന്നു.
മാര്ച്ച് ഒന്നാം തീയതിയാണ് റിഫ മെഹ്നുവിനെ ദുബായിലെ ഫ്ലാറ്റില് തൂങ്ങിമരിച്ച നിലയില് കണ്ടെത്തുന്നത്.
സംഭവത്തില് വ്ളോഗറും ഭര്ത്താവുമായ കാസര്കോട് സ്വദേശി മെഹ്നാസിനെതിരെ കഴിഞ്ഞ ദിവസം പോലീസ് കേസെടുത്തിരുന്നു.
306, 408 വകുപ്പുകള് ചേര്ത്താണ് പോലീസ് കേസെടുത്തിരിക്കുന്നത്. മാനസികമായും ശാരീരികമായുമുള്ള പീഡനം റിഫയുടെ മരണത്തിന് കാരണമായതായി പോലീസ് അറിയിച്ചിരുന്നു.
പത്ത് വര്ഷം വരെ തടവ് ലഭിക്കാവുന്ന കുറ്റങ്ങളാണ് മെഹ്നാസിനെതിരെ ചുമത്തിയിരിക്കുന്നത്. ആത്മഹത്യ ചെയ്യത്തക്ക കാരണങ്ങള് ഒന്നും റിഫയ്ക്ക് ഉണ്ടായിരുന്നില്ലെന്നാണ് ബന്ധുക്കളുടെ ആരോപണം.
മരിക്കുന്നതിന് മുമ്പ് റിഫ വീട്ടുകാരുമായി ഫോണില് സംസാരിച്ചിരുന്നുവെന്നും ബന്ധുക്കള് പറയുന്നു.