ബംഗാള് നിയമസഭാ തിരഞ്ഞെടുപ്പിന്റെ ആദ്യ ഫലസൂചനകള് പുറത്ത്.
ദേശീയ രാഷ്ട്രീയത്തില് വന് ചലനങ്ങള്ക്കു കാരണമായേക്കാവുന്ന ബംഗാള് നിയമസഭാ തിരഞ്ഞെടുപ്പിന്റെ ആദ്യ ഫലസൂചനകള് പുറത്ത്. ബിജെപിക്ക് അനുകൂലമാണ് ആദ്യ സൂചനകള്. പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ എന്നിവരുടെ നേതൃത്വത്തില് ബിജെപിയും, മുഖ്യമന്ത്രി മമതാ ബാനര്ജിയുടെ നേതൃത്വത്തില് തൃണമൂല് കോണ്ഗ്രസും നേര്ക്കുനേര് പോരടിച്ച തിരഞ്ഞെടുപ്പാണ് ഇത്തവണത്തേത്. അതുകൊണ്ടുതന്നെ ഫലം ഇരു കൂട്ടര്ക്കും ഒരുപോലെ നിര്ണായകം. ഇവര്ക്കൊപ്പം പരാമവധി സീറ്റു സമാഹരിക്കുകയെന്ന ലക്ഷ്യത്തോടെ ഇടതു പാര്ട്ടികളും കോണ്ഗ്രസും ഉള്പ്പെടുന്ന സഖ്യവുമുണ്ട്.
ആകെ 294 സീറ്റുകളുള്ള ബംഗാള് നിയമസഭയിലേക്ക് എട്ടു ഘട്ടങ്ങളിലാണ് വോട്ടെടുപ്പു നടന്നത്. ഏപ്രില് 29നായിരുന്നു അവസാന ഘട്ട വോട്ടെടുപ്പ്. അധികാരത്തില് ഹാട്രിക് ലക്ഷ്യമിട്ടാണ് മമതാ ബാനര്ജിയും തൃണമൂല് കോണ്ഗ്രസും ഇക്കുറി തിരഞ്ഞെടുപ്പിനെ നേരിട്ടത്. ആകെയുള്ള 294 സീറ്റുകളില് 200ല് അധികം സീറ്റുകള് നേടി വന് അട്ടിമറിയാണ് ബിജെപി ലക്ഷ്യമിടുന്നത്.