കോണ്ഗ്രസിന് ആദായ നികുതി വകുപ്പ് വീണ്ടും നോട്ടീസ് നല്കി
ദില്ലി: 1700 കോടി രൂപ നികുതി അടയ്ക്കണമെന്നാവശൃപ്പെട്ട് ആദായ നികുതി വകുപ്പ് വീണ്ടും കോണ്ഗ്രസിന് നോട്ടീസ് നല്കി. 2017 – 18 സാമ്പത്തിക വര്ഷം മുതല് 2020-21 സാമ്പത്തിക വര്ഷം വരെയുള്ള പിഴയും പലിശയുമടക്കം 1700 കോടി രൂപയുടെ നോട്ടീസാണ് ആദായ നികുതി വകുപ്പ് ഇന്നലെ വൈകുന്നേരം നല്കിയിരിക്കുന്നത്.
ഇതേ കാലയളവിലെ നികുതി പുനര് നിര്ണ്ണയിക്കാനുള്ള ആദായ നികുതി വകുപ്പിന്റെ നടപടിക്കെതിരെ നല്കിയ ഹര്ജി ദില്ലി ഹൈക്കോടതി തള്ളിയതിന് പിന്നാലെയാണ് നടപടി. 2014-15, 2016-17 സാമ്പത്തിക വര്ഷത്തെ നികുതി പുനര് നിര്ണ്ണയത്തിനെതിരെയും ഹൈക്കോടതിയെ സമീപിച്ചെങ്കിലും നിരാശയായിരുന്നു ഫലം.
2018-19 വര്ഷത്തെ നികുതി കുടിശികയായി കോണ്ഗ്രസിന്റെ അക്കൗണ്ടില് നിന്ന് 135 കോടി രൂപ ആദായ നികുതി വകുപ്പ് പിടിച്ചെടുക്കുകയും ചെയ്തിരുന്നു. കഴിഞ്ഞ മൂന്ന് വര്ഷത്തെ നികുതി പുനര് നിര്ണ്ണയത്തിനുള്ള കാലാവധി വരുന്ന ഞായറാഴ്ച അവസാനിക്കും. ഹൈക്കോടതിയിലെ നിയമ പോരാട്ടം പരാജയപ്പെട്ടതോടെ സുപ്രീംകോടതിയെ സമീപിക്കാനാണ് കോണ്ഗ്രസ് നീക്കം.
ആദായ നികുതി വകുപ്പ് അപ്ലേറ്റ് ട്രിബ്യൂണലിനെ സമീപിച്ചെങ്കിലും വകുപ്പിന്റെ നടപടികള് ശരി വയ്ക്കുകയായിരുന്നു. ആദായ നികുതി വകുപ്പ് റിട്ടേണുകള് സമര്പ്പിക്കാത്തിനാലും, സംഭാവന വിവരങ്ങള് മറച്ചു വച്ചതുകൊണ്ടുമാണ് ഭീമമായ പിഴ ഈടാക്കുന്നതെന്നാണ് ആദായ നികുതി വകുപ്പിന്റെ പ്രതികരണം.