കൊക്കയാറില് കാണാതായവരില് മൂന്ന് പേരുടെ മൃതദേഹം കണ്ടെത്തി.
കൊക്കയാറിലെ ഉരുള്പൊട്ടലില് കാണാതായവരില് മൂന്ന് പേരുടെ മൃതദേഹം കണ്ടെത്തി.മൂന്ന് കുട്ടികളുടെ മൃതദേഹങ്ങളാണ് കണ്ടെടുത്തത്. മൃതദേഹങ്ങള് പൂര്ണ്ണമായി മണ്ണില് പൊതിഞ്ഞ് കിടക്കുന്ന നിലയിലായിരുന്നു. ജെസിബി ഉപയോഗിച്ച് മണ്ണ് നീക്കം ചെയ്ത് പരിശോധിക്കുന്നതിന് ഇടയിലാണ് മൃതദേഹങ്ങള് കണ്ടെത്തിയത്. രാവിലെ ഏഴുമണി മുതല് എന്ഡിആര്എഫും പൊലീസും പ്രദേശത്ത് തിരച്ചില് നടത്തുകയാണ്. ഇനി അഞ്ചുപേരെയാണ് ഇവിടെ കണ്ടെത്താനുള്ളത്.അതേസമയം പെരുവന്താനം നിര്മലഗിരിയില് മലവെള്ളപാച്ചിലില് കാണാതായ ആളുടെ മൃതദേഹം കണ്ടെത്തി.
വടശ്ശേരിയില് ജോജോയുടെ മൃതദേഹമാണ് കണ്ടെത്തിയത്. വീടിന് സമീപത്തെ മണ്ണും ചെളിയും നീക്കം ചെയ്യുന്നതിനിടെയാണ് ജോജോ മലവെള്ളപാച്ചിലില്പ്പെട്ടത്. മൃതദേഹം കാഞ്ഞിരപ്പള്ളി ജനറല് ആശുപത്രിയില് സൂക്ഷിച്ചിരിക്കുകയാണ്.മഴയുടെ ശക്തി കുറഞ്ഞെങ്കിലും തിരുവനന്തപുരം മുതല് കോഴിക്കോട് വരെയുള്ള 11 ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ചുരുങ്ങിയ സമയത്തില് തോരാതെ പെയ്ത് വലിയ നാശനഷ്ടങ്ങള് ഉണ്ടാക്കുന്ന പെരുമഴയ്ക്ക് കാരണം ലഘുമേഘ വിസ്ഫോടനമാണെന്നാണ് വിലയിരുത്തല്. അസാധാരണമായി രൂപംകൊള്ളുന്ന മേഘകൂമ്പാരങ്ങളാണ് പലയിടത്തും രണ്ട് മണിക്കൂറില് അഞ്ച് സെന്റിമീറ്ററിലധികം തീവ്രമഴയായി പെയ്തിറങ്ങിയത്.