കുടുംബശ്രീയുടെ കൂട്ട് വേണ്ട ; തോമസ് ഐസക്കിന് താക്കീത്
തിരുവനന്തപുരം: തെരഞ്ഞെടുപ്പ് ചട്ട ലംഘന പരാതിയില് തോമസ് ഐസക്കിന് ജില്ലാ വരണാധികാരിയുടെ താക്കീത്. കുടുംബശ്രീയുടെ ഔദ്യോഗിക പരിപാടിയില് പങ്കെടുത്തതിനാണ് താക്കീത്. ഇത് തെരഞ്ഞെടുപ്പ് ചട്ട ലംഘനമാണ്, ഇനി സര്ക്കാര് പരിപാടികളില് പങ്കെടുക്കരുത് എന്നാണ് താക്കീത്.
യുഡിഎഫിന്റെ പരാതിയില് തോമസ് ഐസക്കിന്റെ വിശദീകരണം കൂടി പരിശോധിച്ച ശേഷമാണ് നടപടി. ഇന്ന് കളക്ട്രേറ്റിലെത്തി തോമസ് ഐസക് നാമനിര്ദേശ പത്രിക സമര്പ്പിച്ചു. കുടുംബശ്രീ പ്രവര്ത്തകര് ആണ് കെട്ടിവയ്ക്കാന് തുക നല്കിയിരിക്കുന്നത്. നേരത്തെ തെരഞ്ഞെടുപ്പ് പ്രചാരണത്തിനായി കുടുംബശ്രീ അടക്കമുള്ള സര്ക്കാര് സംവിധാനങ്ങള് ഉപയോഗപ്പെടുത്തിയെന്നാരോപിച്ച് യുഡിഎഫ് തെരഞ്ഞെടുപ്പ് കമ്മീഷനില് പരാതി നല്കിയത്.
കുടുംബശ്രീ അടക്കമുള്ള സര്ക്കാര് സംവിധാനങ്ങള് തെരഞ്ഞെടുപ്പ് പ്രചാരണത്തിന് ഉപയോഗിച്ചിട്ടില്ലെന്ന വിശദീകരണമാണ് തോമസ് ഐസക് നല്കിയിരുന്നത്. കുടുംബശ്രീയുമായുമായി പണ്ടുമുതല്ക്ക് തന്നെ അടുപ്പമുള്ളതാണ്, കുടുംബശ്രീയുടെ ഔദ്യോഗികപരിപാടിയില് പങ്കെടുത്തിട്ടില്ല, യോഗം നടക്കുന്നിടത്ത് പോയി വോട്ട് ചോദിക്കും, തോമസ് ഐസക്കിന്റെ വിശദീകരണം ഇതായിരുന്നു