കാലിത്തീറ്റ കുംഭകോണ കേസില് ലാലു പ്രസാദ് യാദവിന് അഞ്ചു വര്ഷം തടവ്: 60 ലക്ഷം രൂപ പിഴയും
പട്ന കാലിത്തീറ്റ കുംഭകോണത്തിലെ അവസാന കേസില് മുഖ്യപ്രതിയായ മുന് ബിഹാര് മുഖ്യമന്ത്രിയും ആര്ജെഡി അധ്യക്ഷനുമായ ലാലു പ്രസാദ് യാദവിന് അഞ്ചു വര്ഷം തടവ്. 60 ലക്ഷം രൂപ പിഴയും അടയ്ക്കണം. ലാലു കുറ്റക്കാരനെന്ന് റാഞ്ചിയിലെ സിബിഐ പ്രത്യേക കോടതി കഴിഞ്ഞ ദിവസം വിധി പ്രസ്താവിച്ചിരുന്നു. തെളിവുകളുടെ അഭാവത്തില് കേസില് പ്രതികളായ 6 സ്ത്രീകള് ഉള്പ്പെടെ 24 പേരെ കോടതി വെറുതെ വിട്ടിരുന്നു.ഡൊറാന്ഡ ട്രഷറിയില്നിന്നു 139.35 കോടി രൂപയുടെ ക്രമക്കേടു നടത്തിയെന്നതാണ് അഞ്ചാമത്തേതും അവസാനത്തേതുമായ കേസ്. ആദ്യത്തെ നാലു കേസുകളില് തടവു ശിക്ഷ വിധിക്കപ്പെട്ട ലാലുവിനു ജാമ്യം ലഭിച്ചിരുന്നു. 2017 ഡിസംബര് മുതല് മൂന്നര വര്ഷത്തിലേറെ ജയില്വാസം അനുഭവിച്ച ശേഷമാണു ലാലുവിനു ജാമ്യം അനുവദിച്ചത്. ലാലു യാദവ് ബിഹാര് മുഖ്യമന്ത്രിയായിരിക്കെയാണു മൃഗക്ഷേമ വകുപ്പില് 950 കോടി രൂപയുടെ കാലിത്തീറ്റ കുംഭകോണം അരങ്ങേറിയത്.