ഇടുക്കിയില്‍ അഞ്ചു പഞ്ചായത്തുകളില്‍ കൂടി ആഫ്രിക്കന്‍ പന്നിപ്പനി സ്ഥിരീകരിച്ചു.
ഇടുക്കിയില്‍ അഞ്ചു പഞ്ചായത്തുകളില്‍ കൂടി ആഫ്രിക്കന്‍ പന്നിപ്പനി സ്ഥിരീകരിച്ചു. പന്നിപ്പനി സ്ഥിരീകരിച്ച ഫാമുകളിലെ 140 തിലധികം പന്നികളെ കൊന്നു.ജാഗ്രത പാലിക്കണമെന്ന് ജില്ല ഭരണകൂടം. ഇടുക്കിയിലെ പെരുവന്താനം, വണ്ടന്മേട്, വാഴത്തോപ്പ്, കൊന്നത്തടി, കഞ്ഞിക്കുഴി എന്നീ പഞ്ചായത്തുകളിലാണ് പന്നിപ്പനി സ്ഥിരീകരിച്ചത്. ഇവിടങ്ങളിലെ ചില ഫാമുകളില്‍ കഴിഞ്ഞ ദിവസം പന്നികള്‍ കൂട്ടത്തോടെ ചത്തിരുന്നു.തുടര്‍ന്ന് സാമ്പിള്‍ പരിശോധനക്ക് അയച്ചിരുന്നു.പെരുവന്താനം പഞ്ചായത്ത് ഏഴാം വാര്‍ഡായ മതമ്പയില്‍ സോജന്‍ എന്നയാളുടെ ഫാമിലും വണ്ടന്മേട് പഞ്ചായത്ത് 16 -ാം വാര്‍ഡായ മേപ്പാറയില്‍ ജെയ്‌സ് ജോസഫ്,വാഴത്തോപ്പ് പഞ്ചായത്ത് രണ്ടാം വാര്‍ഡ് പാല്‍ക്കുളംമേട് പയസ് ജോസഫ് എന്നയാളുടെ ഫാമിലും പുതിയതായി രോഗം സ്ഥിരീകരിച്ചു.കഞ്ഞിക്കുഴി പഞ്ചായത്തിലെ 12 -ാംെ വാര്‍ഡിലുള്ള കുഞ്ഞുമോള്‍ ശശിയുടെയും കൊന്നത്തടി പഞ്ചായത്ത് പതിമൂന്നാം വാര്‍ഡിലെ മങ്കുവയില്‍ ജീവ ജോയി എന്നയാളുടെ ഫാമിലും രോഗബാധ സ്ഥിരീകരിച്ചിട്ടുണ്ട്.പെരുവന്താനം, വണ്ടന്മേട് വാഴത്തോപ്പ് എന്നിവിടങ്ങളില്‍ രോഗബാധ കണ്ടെത്തിയ ഫാമുകളിലെ പന്നികളെ ദയാവധം ചെയ്തു.
വണ്ടന്മേട് പഞ്ചായത്തിലെ മേപ്പാറയില്‍ മാസങ്ങളായി പഞ്ചായത്ത് ലൈസന്‍സ് പോലുമില്ലാതെയാണ് ഫാം പ്രവര്‍ത്തിച്ചിരുന്നത്. പന്നികള്‍ കൂട്ടത്തോടെ ചത്തപ്പോള്‍ ഇന്‍ഷ്വറന്‍സ് തുക കിട്ടുമോയെന്നറിയാന്‍ ഉടമ മൃഗസംരക്ഷണ വകുപ്പിനെ സമീപിച്ചപ്പോഴാണ് സംഭവം പറത്തറിഞ്ഞത്. രോഗം സ്ഥിരീകരിച്ച ഫാമുകളുടെ പത്തു കിലോമീറ്റര്‍ ചുറ്റളവ് ജില്ല ഭരണകൂടം നിരീക്ഷണ മേഖലയായി പ്രഖ്യാപിച്ചു. രോഗബാധയുള്ള മറ്റു ഫാമുകളിലെ പന്നികളെയും കൊല്ലുമെന്ന് മൃഗസംരക്ഷണ വകുപ്പ് അറിയിച്ചു. ആഫ്രിക്കന്‍ പന്നിപ്പനി ഇടുക്കി ജില്ലയില്‍ വ്യാപിക്കുന്നുവെന്ന് മൃഗസംരക്ഷണ വകുപ്പ് മുന്നറിയിപ്പ് നല്‍കി ദിവസങ്ങള്‍ പിന്നിടുമ്പോഴാണ് പുതിയ ഫാമുകളിലും രോഗബാധ കണ്ടെത്തിയത്.നേരത്തെ കരിമണ്ണൂര്‍, വണ്ണപ്പുറം,കഞ്ഞിക്കുഴി പഞ്ചായത്തുകളിലെ പന്നികളെ കൊന്നൊടുക്കിയിരുന്നു. രോഗം ബാധിച്ച പന്നികളെ വില്‍ക്കുകയോ കൊല്ലുകയോ ചെയ്യരുതെന്നും മൃഗസംരക്ഷണ വകുപ്പ് കര്‍ഷകരോട് ആവശ്യപ്പെട്ടിരുന്നു. ആഫിക്കന്‍ പന്നിപ്പനി മനുഷ്യനെ ബാധിക്കുന്ന അസുഖമല്ല. പന്നികള്‍ക്ക് ഇത് മാരകമായ രോഗമാണ്. കൂട്ടത്തോടെ പന്നികള്‍ മരിക്കുന്നതിന് സാധ്യതയുണ്ട്.