ആലപ്പുഴ അപ്പര്കുട്ടനാട്ടില് വെള്ളപ്പൊക്കം; താഴ്ന്ന പ്രദേശങ്ങള് വെള്ളത്തിനടിയില്
ആലപ്പുഴ: കഴിഞ്ഞ ദിവസങ്ങളില് പെയ്ത കനത്ത മഴയെ തുടര്ന്ന് അപ്പര് കുട്ടനാട്ടില് വെള്ളപ്പൊക്കം രൂക്ഷമായി തുടരുന്നു. താഴ്ന്ന പ്രദേശങ്ങള് വെള്ളത്തിനടിയിലായി. പുളിങ്കുന്ന്, നെടുമുടി, പൂപ്പള്ളി എന്നിവിടങ്ങളിലേക്കുള്ള സര്വീസുകള് കെ.എസ്.ആര്.ടി.സി താല്ക്കാലികമായി നിര്ത്തിവെച്ചതായി അറിയിച്ചു. എടത്വ-ഹരിപ്പാട്, അമ്പലപ്പുഴ-തിരുവല്ല പാതയിലും കെ.എസ്.ആര്.സി സര്വീസില്ല. പമ്പയാര് കരകവിഞ്ഞതോടെ സമീപത്തെ വീടുകളിലെല്ലാം വെള്ളം കയറി. അതേസമയം, കക്കി ഡാം കൂടി തുറന്നാല് വെള്ളത്തിന്റെ നിരപ്പ് ഉയരുമെന്നാണ് പ്രദേശവാസികളുടെ ആശങ്ക. കക്കി അണക്കെട്ട് രാവിലെ 11 മണിയോടെ തുറക്കുമെന്നാണ് അറിയിച്ചിട്ടുള്ളത്. കൃത്യമായ അവലോകനം നടത്തിയ ശേഷമാണ് കക്കി ഡാം തുറക്കുന്നതെന്നും ആശങ്കവേണ്ടെന്നും ആരോഗ്യ മന്ത്രി വീണാ ജോര്ജ് പറഞ്ഞു.