വത്സരാജ് തിരഞ്ഞെടുപ്പില് ഇനി മത്സരിക്കാനില്ല
തിരഞ്ഞെടുപ്പില് ഇനി മത്സരിക്കാനില്ലെന്നു പുതുച്ചേരി മുന് മന്ത്രിയും കോണ്ഗ്രസ് നേതാവുമായ ഇ.വത്സരാജ്. പുതുതലമുറയ്ക്കായി വഴിമാറുകയാണെന്ന് അദ്ദേഹം വ്യക്തമാക്കി. മാഹിയില്നിന്നു പുതുച്ചേരി മന്ത്രിസഭയില് ആദ്യമായി എത്തിയ നേതാവാണു വത്സരാജ്. മാഹിയില് 1990 മുതല് 7 തവണ മത്സരിച്ചതില് ആറിലും ജയിച്ച വത്സരാജ് 4 തവണ മന്ത്രിയായി.ബിജെപിയുടെ അടവുകള് പുതുച്ചേരിയില് വിലപ്പോകില്ലെന്നു വത്സരാജ് പറഞ്ഞു. ഇപ്പോള് ബിജെപിയിലേക്കു പോയ കോണ്ഗ്രസ് എംഎല്എമാര് നാലും അഞ്ചും തവണ പാര്ട്ടി മാറിയവരാണ്. പുതുച്ചേരിയില് ബിജെപിക്ക് 2.44% വോട്ടേയുള്ളൂ. അവര്ക്ക് ജയിക്കാവുന്ന ഒരു സാഹചര്യവും മുന്നിലില്ല. ബിജെപി സമീപിച്ചിരുന്നതായി മാഹി എംഎല്എ വി.രാമചന്ദ്രന് പറഞ്ഞതായി കണ്ടു. അതു നടന്നത് 2 വര്ഷം മുന്പാണ്. അക്കാര്യം അപ്പോള് പറയാതിരുന്നതില് ദുരൂഹതയുണ്ടെന്നും വത്സരാജ് ആരോപിച്ചു.