സിസ്റ്റര് അഭയ കൊലക്കേസിലെ ഒന്നാം പ്രതി ഫാ. തോമസ് കോട്ടൂരിന് 90 ദിവസത്തെ പരോള് അനുവദിച്ചു.
സിസ്റ്റര് അഭയ കൊലക്കേസിലെ ഒന്നാം പ്രതി ഫാ. തോമസ് കോട്ടൂരിന് 90 ദിവസത്തെ പരോള് അനുവദിച്ചു. പൂജപ്പുര സെന്ട്രല് ജയിലില് കോവിഡ് വര്ധിച്ചുവെന്ന കാരണം ചൂണ്ടിക്കാട്ടിയാണ് പരോള് അനുവദിച്ചിരിക്കുന്നത്.ഹൈക്കോടതി ജഡ്ജി സി.ടി. രവികുമാര്, ആഭ്യന്തര സെക്രട്ടറി ടി.കെ. ജോസ്, ജയില് ഡി.ജി.പി ഋഷിരാജ് സിങ് എന്നിവരടങ്ങിയ ജയില് ഹൈപവര് കമ്മിറ്റി, 60 വയസ്സു കഴിഞ്ഞ പ്രതികള്ക്ക് പരോള് അനുവദിച്ചതിന്റെ കൂടെയാണ് അഭയ കേസിലെ പ്രതിയ്ക്കും പരോള് ലഭിച്ചത്.ജയിലിലെ ഹൈപവര് കമ്മിറ്റി 90 ദിവസം പരോള് അനുവദിച്ചതിനെ തുടര്ന്ന് കഴിഞ്ഞ ദിവസം പ്രതി ഫാ. തോമസ് കോട്ടൂര് ജയിലില് നിന്നിറങ്ങി.അഭയ കേസിലെ പ്രതികളായ ഫാ. തോമസ് കോട്ടൂരിന് ഇരട്ട ജീവപര്യന്തവും കഠിനതടവും, സിസ്റ്റര് സെഫിയ്ക്ക് ജീവപര്യന്തവും കഠിനതടവുമാണ് സി.ബി.ഐ. കോടതി ശിക്ഷ വിധിച്ചത്. അഞ്ച് മാസം പോലും തികയുന്നതിനു മുന്പാണ് പ്രതി തോമസ് കോട്ടൂരിന് പരോള് അനുവദിച്ചതെന്ന് ജോമോന് പുത്തന്പുരയ്ക്കല് ആരോപിച്ചു.ഫാ. തോമസ് കോട്ടൂര് നല്കിയ ജാമ്യ ഹരജി ജസ്റ്റിസ് കെ. വിനോദ് ചന്ദ്രന് അധ്യക്ഷനായ ഹൈകോടതി ഡിവിഷന് ബെഞ്ച് കഴിഞ്ഞ നാല് മാസത്തിനുള്ളില് അഞ്ച് പ്രാവശ്യം തള്ളിയിരുന്നു.പ്രതികള്ക്ക് കോടതിയില് നിന്ന് ശിക്ഷ കിട്ടിയാലും ജയിലില് കിടത്താതെ, ഇതുപോലുള്ള പരോളുകള് അനുവദിച്ച് പ്രതികളെ സൈ്വര്യജീവിതം നയിക്കാന് അനുവദിച്ചു കൊടുക്കുന്നത്, നിയമവ്യവസ്ഥയോടും ജനങ്ങളോടുമുള്ള വെല്ലുവിളിയുമാണെന്ന് ജോമോന് പുത്തന്പുരയ്ക്കല് ആരോപിച്ചു.