റോക്കറ്റ് ആക്രമണത്തില് മലയാളി നേഴ്സ് കൊല്ലപ്പെട്ടു
ഹമാസ് നടത്തിയ റോക്കറ്റ് ആക്രമണത്തിലാണ് ഇടുക്കി കീഴിത്തോട് സ്വദേശി സൗമ്യ സന്തോഷ്(31) ഇസ്രയേലില് കൊല്ലപ്പെട്ടത്. കെയര് ടേക്കറായി ജോലി ചെയ്യുകയായിരുന്നു സൗമ്യ. ഏഴ് വര്ഷമായി സൗമ്യ ഇസ്രയേലില് ജോലി ചെയ്തു വരികയാണ്. ആക്രമണത്തില് ഇസ്രായേല് സ്വദേശിയായ ഒരു യുവതിയും കൊല്ലപ്പെട്ടു .
ഭര്ത്താവുമായി ഫോണില് സംസാരിച്ചുകൊണ്ടിരിക്കുമ്പോഴായിരുന്നു മരണം ഷെല്ലുകളുടെ രൂപത്തില് സൗമ്യയുടെ ജീവന് കവര്ന്നത്. ഭര്ത്താവ് സന്തോഷ് തന്നെയാണ് നിറകണ്ണുകളോടെ ഇക്കാര്യം മാധ്യമങ്ങളോട് വെളിപ്പെടുത്തിയത്. സംസാരിക്കുന്നതിനിടെ പെട്ടെന്നാണ് ഫോണ് ഡിസ്കണക്ടായത്. വീണ്ടും വിളിച്ചെങ്കിലും ഫോണ് എടുത്തില്ല. ഉടന് തന്നെ സമീപത്തുള്ള ബന്ധുവിനെ വിളിച്ച് കാര്യം തിരക്കിയപ്പോഴാണ് സംഭവം അറിയുന്നതെന്ന് സന്തോഷ് പറഞ്ഞു.