പള്‍സര്‍ സുനി ജാമ്യം തേടി സുപ്രീംകോടതിയില്‍.
ന്യൂഡല്‍ഹി: നടിയെ ആക്രമിച്ച കേസില്‍ ജാമ്യം തേടി സുപ്രീംകോടതിയെ സമീപിച്ച് പള്‍സര്‍ സുനി. കേസില്‍ വിചാരണ നടപടികള്‍ വൈകുന്നതിനാല്‍ ജാമ്യം നല്‍കണമെന്നാണ് പള്‍സര്‍ സുനിയുടെ ആവശ്യം. കേസില്‍ താന്‍ ഒഴികെയുള്ള എല്ലാ പ്രതികള്‍ക്കും ജാമ്യം ലഭിച്ചുവെന്നും അഞ്ച് വര്‍ഷമായി ജയിലില്‍ കഴിയുകയാണെന്നും പള്‍സര്‍ സുനി ഹര്‍ജിയില്‍ പറയുന്നു.ഹൈക്കോടതി ജാമ്യം നിഷേധിച്ചതിന് എതിരായുള്ള അപ്പീല്‍ ചൊവ്വാഴ്ച രാവിലെയാണ് പള്‍സര്‍ സുനി സുപ്രീംകോടതിയില്‍ സമര്‍പ്പിച്ചത്. ഹര്‍ജി അടുത്തയാഴ്ചയോടെ സുപ്രീംകോടതി പരിഗണിക്കുമെന്നാണ് വിവരം.സമീപകാലത്തൊന്നും കേസിലെ വിചാരണ നടപടികള്‍ പൂര്‍ത്തിയാകാന്‍ സാധ്യതയില്ലെന്നും ഹര്‍ജിയില്‍ ചൂണ്ടിക്കാട്ടുന്നു. നേരത്തെ കേസില്‍ വിചാരണ നീണ്ടുപോകുന്നത് കണക്കിലെടുത്ത് മറ്റൊരു പ്രതി മാര്‍ട്ടിന്‍ ആന്റണിക്ക് സുപ്രീംകോടതി ജാമ്യം അനുവിദിച്ചിരുന്നു. ഇതിന് പുറമേ നാലാം പ്രതി വിജീഷിന് ഹൈക്കോടതിയും ജാമ്യം നല്‍കി. ഇതെല്ലാം പള്‍സര്‍ സുനി സുപ്രീംകോടതിയില്‍ നല്‍കിയ ഹര്‍ജിയില്‍ പറയുന്നു.
