തിരുവനന്തപുരത്ത് പോലീസുകാരന്‍ തൂങ്ങിമരിച്ചു
തിരുവനന്തപുരം: തിരുവനന്തപുരം പാളയത്ത് പോലീസുകാരനെ തൂങ്ങിമരിച്ച നിലയില്‍ കണ്ടെത്തി. എആര്‍ ക്യാമ്പിലെ ഗ്രേഡ് എഎസ്ഐ ബിനോയ് രാജ് (47) ആണ് മരിച്ചത്. രാത്രി എട്ടരയോടെയായിരുന്നു സംഭവം.
പോലീസ് ക്വാട്ടേഴ്സിലെ പാര്‍ക്കിംഗ് ഏരിയിലാണ് ബിനോയിയെ തൂങ്ങി മരിച്ച നിലയില്‍ കണ്ടെത്തിയത്. അദ്ദേഹത്തിന്റെ വാഹനം നിര്‍ത്തുന്ന സ്ഥലത്തായിരുന്നു മൃതദേഹം കണ്ടെത്തിയത്. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.
വെള്ളായണി സ്വദേശിയാണ് അദ്ദേഹം.വര്‍ഷങ്ങളായി അദ്ദേഹം ഭാര്യയ്ക്കും മകനുമൊപ്പം ക്വാട്ടേഴ്സിലാണ് താമസം. മരണകാരണം എന്താണെന്ന കാര്യത്തില്‍ വ്യക്തതയില്ല. ബിനോയ്ക്ക് സാമ്പത്തിക ബുദ്ധിമുട്ടുകള്‍ ഉണ്ടായിരുന്നതായാണ് സഹപ്രവര്‍ത്തകര്‍ പറയുന്നത്. ഇതാണ് ആത്മഹത്യയിലേക്ക് നയിച്ചതെന്നാണ് നിഗമനം. ആത്മഹത്യ ചെയ്യത്തക്കവണ്ണം വ്യക്തിപരമായോ അല്ലാതെയോ അദ്ദേഹത്തിന്പ്രശ്നങ്ങള്‍ ഇല്ലെന്നാണ് പോലീസ് പറയുന്നത്.
വൈകീട്ട് ഏഴരയോട് കൂടി ഹെഡ് ക്വാട്ടേഴ്സിന് സമീപം മരം പൊട്ടിവീണിരുന്നു. ഇവിടെ വെച്ച് ബിനോയിയെ കണ്ടിരുന്നതായാണ് അദ്ദേഹത്തിന്റെ സഹപ്രവര്‍ത്തകര്‍ പറയുന്നത്. ഇതിന് ശേഷമാണ് മരിച്ച നിലയില്‍ കണ്ടത്.