ട്രംപ് അനുകൂലികള് യുഎസ് പാര്ലമെന്റില് ഇരച്ചുകയറി അക്രമം; 4 മരണം…
യുഎസിനെയും ലോകത്തെയും ഞെട്ടിച്ച് യുഎസ് പാര്ലമെന്റിലേക്ക് അതിക്രമിച്ചു കടന്ന് ട്രംപ് അനുകൂലികളുടെ തേര്വാഴ്ച. നിയുക്ത പ്രസിഡന്റ് ജോ ബൈഡന്റെ വിജയം അംഗീകരിക്കാന് യുഎസ് കോണ്ഗ്രസിന്റെ ഇരു സഭകളും സമ്മേളിക്കുന്നതിനിടെയാണു അക്രമാസക്തരായ ആയിരക്കണക്കിനു ട്രംപ് അനുകൂലികള് കാപ്പിറ്റോള് മന്ദിരത്തിലെ സുരക്ഷാവലയം ഭേദിച്ച് അകത്തുകടന്നത്.
കലാപത്തില് ഒരു സ്ത്രീ ഉള്പ്പെടെ നാലു പേര് മരിച്ചു. കാപ്പിറ്റോള് മന്ദിരത്തിനുള്ളിലാണ് സ്ത്രി വെടിയേറ്റു മരിച്ചതെന്ന് രാജ്യാന്തര മാധ്യമങ്ങള് റിപ്പോര്ട്ട് ചെയ്തു. പരുക്കേറ്റ അഞ്ച് പേരെ ആശുപത്രിയിലേക്കു മാറ്റി. കാപ്പിറ്റോള് മന്ദിരത്തിനു സമീപത്തു നിന്ന് സ്ഫോടകവസ്തു കണ്ടെടുത്തതായും റിപ്പോര്ട്ടുകളുണ്ട്. പാര്ലമെന്റിലേക്ക് അതിക്രമിച്ചു കടന്നവരെ ഒഴിപ്പിക്കാന് പൊലീസ് കണ്ണീര്വാതകം പ്രയോഗിച്ചു. സ്ഥിതി നിയന്ത്രണവിധേയമാണെന്ന് അധികൃതര് വ്യക്തമാക്കി. ഇന്ത്യന് സമയം പുലര്ച്ചെ ഒരുമണിയോടെയാണു സംഭവങ്ങള്.സെനറ്റിലും സഭാഹാളിലും പ്രതിഷേധക്കാര് കടന്നതോടെ ഇരുസഭകളും അടിയന്തരമായി നിര്ത്തിവച്ചു. യുഎസ് കോണ്ഗ്രസ് അംഗങ്ങളെ ഒഴിപ്പിച്ചു. യുഎസ് ചരിത്രത്തില് ഇതാദ്യമാണ് പാര്ലമെന്റ് സമ്മേളിക്കുന്നതിടെ ഇത്തരമൊരു സുരക്ഷാവീഴ്ച.