ഓസ്‌കര്‍ മല്‍സരത്തിനൊരുങ്ങി സൂര്യയുടെ സൂരരൈ പൊട്രു
സൂര്യയെ കേന്ദ്രകഥാപാത്രമാക്കി സുധ കൊങ്കാര പ്രസാദ് സംവിധാനം ചെയ്ത സൂരരൈ പൊട്രു ഒന്നിലധികം വിഭാഗങ്ങളില്‍ ഓസ്‌കറില്‍ മത്സരിക്കും. 2 ഡി എന്റര്‍ടൈന്‍മെന്റിന്റെ നിര്‍മ്മാതാക്കളിലൊരാളായ രാജശേഖര്‍ പാണ്ഡ്യന്‍ സമൂഹമാധ്യമത്തിലൂടെ ഇക്കാര്യം അറിയിച്ചു.
അക്കാദമി അവാര്‍ഡ് കമ്മിറ്റിയില്‍ നിന്നുള്ള ഇ-മെയിലിന്റെ സ്‌ക്രീന്‍ഷോട്ടുകള്‍ ട്വിറ്ററില്‍ പങ്കുവച്ചുകൊണ്ടാണ് അദ്ദേഹം സന്തോഷവാര്‍ത്ത അറിയിച്ചത്.
കോവിഡ് പ്രതിസന്ധി കാരണം ചിത്രം ആമസോണ്‍ പ്രൈംവീഡിയോയില്‍ റിലീസ് ചെയ്യുകയായിരുന്നു.
മികച്ച നടന്‍, മികച്ച നടി, മികച്ച സംവിധായകന്‍, മികച്ച ഒറിജിനല്‍ സ്‌കോര്‍ തുടങ്ങിയ വിഭാഗങ്ങളില്‍ ചിത്രം ഓസ്‌കര്‍ അവാര്‍ഡിനായി തിരഞ്ഞെടുക്കപ്പെട്ടതില്‍ അണിയറ പ്രവര്‍ത്തകര്‍ സന്തോഷത്തിലാണ്. സൂരരൈ പൊട്രു ടീമിനെ സംബന്ധിച്ച് അഭിമാന നിമിഷമാണ് ഇത്.
ഇന്ത്യയിലെ ആദ്യ ബജറ്റ് എയര്‍ലൈനായ എയര്‍ ഡെക്കാന്റെ സ്ഥാപകന്‍ ക്യാപ്റ്റന്‍ ജി.ആര്‍. ഗോപിനാഥിന്റെ ആത്മകഥയായ ‘സിംപ്ലി ഫ്‌ളൈ – എ ഡെക്കാന്‍ ഒഡീസി’ എന്ന പുസ്തകത്തെയും അദ്ദേഹത്തിന്റെ വ്യോമയാന വ്യവസായത്തിലെ സംഭവവികാസങ്ങളെയും ആധാരമാക്കിയാണ് ചിത്രം ഒരുക്കിയിരിക്കുന്നത്. 2020 നവംബര്‍ 12 ന് ആമസോണ്‍ പ്രൈം വീഡിയോയില്‍ റിലീസ് ചെയ്ത ചിത്രം നിരൂപക, പ്രേക്ഷക പ്രശംസ പിടിച്ചുപറ്റി.
ഇന്ത്യടുഡേ നിരൂപകന്‍ ലോഗേഷ് ബാലചന്ദ്രന്‍ 5-ല്‍ 3.5 സ്റ്റാറും ചിത്രത്തിന് കൊടുത്തിരുന്നു. ‘തിരക്കഥയില്‍ വളരെയധികം വളവുകളും തിരിവുകളും ഇല്ലെങ്കിലും, ആഖ്യാനം കൊണ്ട് സിനിമ രസകരമാക്കാന്‍ സുധ കൊങ്കാരയ്ക്ക് കഴിഞ്ഞു. മറ്റൊന്ന്.
ബേക്കറി സ്വന്തമാക്കാന്‍ ആഗ്രഹിക്കുന്ന ബോമിയുമായുള്ള (അപര്‍ണ ബാലമുരളി) മാരയുടെ ഹൃദയ ബന്ധമാണ് ചിത്രത്തിന്റെ കരുത്ത്. പുരുഷാധിപത്യത്തെ അവര്‍ ചോദ്യം ചെയ്യുന്നു, അതേ സമയം തന്നെ പുരുഷന്റെ സ്വപ്നത്തെ പിന്തുണക്കുകയും ചെയ്യുന്നു’ എന്നാണ് ലോഗേഷ് എഴുതിയത്.
