പണമിടപാട് : ദില്ലിയില്‍ വെടിവെപ്പ്: രണ്ട് സ്ത്രീകള്‍ കൊല്ലപ്പെട്ടു
ദില്ലി: ദില്ലിയിലെ ആര്‍ കെ പുരത്ത് ഇന്ന് പുലര്‍ച്ച നടന്ന വെടിവെപ്പില്‍ രണ്ട് സ്ത്രീകള്‍ കൊല്ലപ്പെട്ടു. ഗുരുതരമായി പരിക്കേറ്റതിനാല്‍ ദില്ലി എയിംസ് ആശുപത്രിയില്‍ പ്രവേശിപ്പിച്ചിരുന്നു. 
ചികിത്സയിലിരിക്കെയാണ് മരണം. ആര്‍കെ പുരം അംബേദ്കര്‍ കോളനിയിലെ താമസക്കാരായ പിങ്കി, ജ്യോതി എന്നിവരാണ് മരിച്ചത്. പിങ്കിക്ക് 30 ഉം ജ്യോതിക്ക് 28 ഉം വയസാണ് പ്രായം. പണമിടപാടുമായി ബന്ധപ്പെട്ട തര്‍ക്കത്തിനിടെയാണ് വെടിവെപ്പ് നടന്നതെന്നാണ് വിവരം. ദില്ലി പൊലീസ് അക്രമികള്‍ക്കായി തെരച്ചില്‍ തുടങ്ങി. വെടിവെച്ചവരും പരിക്കേറ്റവരും ബന്ധുക്കളാണെന്നാണ് വിവരം. രണ്ട് യുവാക്കളാണ് ആക്രമണം നടത്തിയത്. ഇവരിലൊരാളാണ് തോക്കുപയോഗിച്ച് വെടിവെച്ചത്. പ്രതികള്‍ ഒളിവിലാണ്. ആര്‍കെ പുരം പൊലീസ് സംഭവത്തില്‍ കേസെടുത്ത് അന്വേഷണം തുടങ്ങി.
