ശബരിമല തീർത്ഥാടന കേന്ദ്രമായ എരുമേലിയുടെ വികസനത്തിന് മാസ്റ്റർ പ്ലാൻ അനിവാര്യമാണ് ;  ജനപ്രതിനിധികൾ

എരുമേലി: എരുമേലിയുടെ വികസനം രാജ്യത്തുതന്നെ മാതൃകയാകുമെന്ന് പത്തനംതിട്ട എംപി ആന്റോ ആൻറണി പറഞ്ഞു. ശബരിമല തീർഥാടന കേന്ദ്രമായ എരുമേലിയുടെ സമഗ്രമായ വികസനത്തിന് മാസ്റ്റർ പ്ലാൻ തയ്യാറാക്കേണ്ടതുണ്ട് .എരുമേലിയിലെ എല്ലാ കേന്ദ്ര വികസന പദ്ധതികൾക്കും കേന്ദ്ര സർക്കാരിന്റെ 50% തുക  ലഭിക്കുന്നതായും എംപി പറഞ്ഞു. എരുമേലിയുടെ വികസന സ്വപ്നങ്ങൾക്ക്  ജനകീയ ചർച്ച അത്യാവശ്യമാണെന്നും അദ്ദേഹം പറഞ്ഞു.എരുമേലി ഡെവലപ്മെൻറ് കൗൺസിൽ സംഘടിപ്പിച്ച വികസന സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എരുമേലി സാമൂഹിക ആരോഗ്യ കേന്ദ്രത്തിന് എംപിയുടെ വികസന ഫണ്ടിൽ നിന്നും ആംബുലൻസ് അനുവദിക്കുന്നതായും അദ്ദേഹം പറഞ്ഞു. തോടുകളുടെ ശുചീകരണം, റോഡുകളുടെ നവീകരണം,കുടിവെള്ളം പദ്ധതികൾ അടക്കം  കൂടുതൽ ഒരുക്കേണ്ടതുണ്ടെന്നും അദ്ദേഹം പറഞ്ഞു. സംസ്ഥാന യോഗയിൽ സ്വർണ്ണ മെഡലും , ദേശീയ യോഗ ഒളിമ്പ്യാഡിലും  സ്വർണ്ണ മെഡൽ ലഭിച്ച എരുമേലി ചെമ്പകപ്പാറ സ്വദേശിനി  രേവതി രാജേഷിനെ ചടങ്ങിൽ   ഉപഹാരം  നൽകി ആദരിച്ചു.