ഭക്തിയുടെ നിറക്കാഴ്ചയൊരുക്കി എരുമേലി പേട്ടതുള്ളല്‍ ഭക്തി സാന്ദ്രമായി .
ശരണമന്ത്രങ്ങളുടെ സംഗമഭൂമിയില്‍ ആചാരാനുഷ്ഠാനങ്ങള്‍ നിറവേറ്റി എരുമേലിയില്‍ ചരിത്ര പ്രസിദ്ധമായമായ പേട്ടതുള്ളല്‍ ഭക്തി സാന്ദ്രമാക്കി.ശബരിമല തീര്‍ഥാടനത്തിന് സമാപനം വിളിച്ചോതുന്ന ചരിത്ര പ്രസിദ്ധമായ അമ്പലപ്പുഴ – ആലങ്ങാട് ദേശക്കാരുടെ എരുമേലി പേട്ടതുള്ളലാണ് ഭക്തിയുടെ ദൈവീക സാന്നിധ്യവും,വര്‍ണ്ണ വിസ്മയങ്ങളുടെ നിറക്കാഴ്ചയും ഒരുക്കി കൊണ്ടാടിയത്.
ചരിത്രത്തിലാദ്യമായി കൊവിഡ് മഹാമാരിയുടെ പശ്ചാത്തലത്തില്‍ പേട്ടതുള്ളല്‍ സംഘത്തില്‍ എണ്ണം കുറഞ്ഞ സംഘാംഗങ്ങളാണ് ഇത്തവണ പേട്ട തുള്ളിയത്.11.20 ന് കൊച്ചമ്പലത്തിന് കിഴക്ക് ഭാഗത്തായി അമ്പലപ്പുഴ ശ്രീകൃഷ്ണ ഭഗവാന്റെ നിറസാന്നിദ്ധ്യമായി ശ്രീകൃഷ്ണപ്പരുന്ത് പറന്നുയര്‍ന്നതോടെ
പേട്ടപ്പുറപ്പാടിനുള്ള അനുവാദമായി.വാദ്യമേളങ്ങളും – ശരണമന്ത്രങ്ങളും ഉയരുമ്പോള്‍ കൊച്ചമ്പലത്തില്‍ പൂജകഴിഞ്ഞ് തിടമ്പ് ഏറ്റുവാങ്ങുന്നതിനിടെ മറ്റൊരു ചരിത്രത്തിനും അമ്പലപ്പുഴ സംഘത്തിന്റെ പേട്ടതുള്ളലിന് പേട്ട കൊച്ചമ്പലം വേദിയായി.
കൊച്ചമ്പലത്തില്‍ നിന്നും വാവര് പള്ളിയില്‍ കയറിയ പേട്ട സംഘത്തെ ജമാത്ത് കമ്മറ്റി പുഷ്പവൃഷ്ടി നടത്തി സ്വീകരിക്കുകയും,തുടര്‍ന്ന് പ്രദക്ഷിണം വച്ചും , വാരുടെ പ്രതിനിധിയായ ജമാത്ത് പ്രസിഡന്റ് അഡ്വ. പി എച്ച് ഷാജഹാനേയും ചേര്‍ത്താണ് സംഘം വലിയ അമ്പലത്തിലേക്ക് യാത്ര തിരിച്ചത്.ആകാശ നെറുകയില്‍ വെള്ളി നക്ഷത്രം ദൃശ്യമായതോടെയാണ് കൊച്ചമ്പലത്തില്‍ ഉച്ചക്ക് ശേഷം 3.15 ഓടെ രണ്ടാമത്തെ സംഘമായ ആലങ്ങാട് സംഘത്തിന്റെ പേട്ടതുള്ളല്‍ ആരംഭിച്ചത്.അമ്പലപ്പുഴ സംഘത്തോടൊപ്പം വാവരും പോയതിനാല്‍ ആലങ്ങാട് സംഘം പള്ളിയില്‍ കയറാതെ കൊച്ചമ്പലത്തില്‍ നിന്നും നേരെ വലിയ അമ്പലത്തിലേക്ക് നീങ്ങുകയും ചെയ്തു. 
ഐശ്വര്യത്തിന്റേയും – സമാധാനത്തിന്റേയും പ്രതീകമായി ചന്ദനവും – ഭസ്മവും ദേഹമാസകലം പൂശി, തിടമ്പും, കൊടിയും , ഗോളകയുമായി ആലങ്ങാട് സംഘം പേട്ടതുള്ളിയപ്പോള്‍ പേരിന് ഛായം ദേഹത്ത് പൂശിയാണ് അമ്പലപ്പുഴ സംഘം പേട്ട തുള്ളിയത്.ആലങ്ങാട് സംഘത്തിന്റെ പേട്ട തുള്ളലിന് സംഘം പെരിയോന്‍ എ.കെ വിജയകുമാര്‍ അമ്പാടത്ത് യോഗം പ്രതിനിധി പുറയാറ്റ് കളരി രാജേഷ് കുറുപ്പ്, പീതാംബരന്‍,എന്നിവര്‍ നേതൃത്വം നല്‍കി.കോവിഡിന്റെ പശ്ചാത്തലത്തില്‍ 50 പേരുമായാണ് ഇരുസംഘങ്ങളും പേട്ടതുള്ളലിനെത്തിയത്. ദേവസ്വം ബോര്‍ഡ് നല്‍കിയ ഗജവീരനായ മലയാലപ്പുഴ രാജനാണ് ഇരു സംഘങ്ങളുടേയും ഭഗവത് ചൈതന്യമായ തിടമ്പുകേളേറ്റിയത്.വാദ്യമേളങ്ങളുടെ അകമ്പടിയോടെ ശരണമന്ത്രങ്ങളുമായി ഭക്തിയുടെ നിറച്ചാര്‍ത്തേകി അടുത്ത വര്‍ഷത്തെ പേട്ടതുള്ളല്‍ സര്‍വ സന്നാഹങ്ങളും ഒരുക്കി ലക്ഷങ്ങള്‍ക്ക് സാക്ഷിയാകണെമെന്ന് പ്രാര്‍ത്ഥിച്ചു കൊണ്ടാണ് ഇരുസംഘങ്ങളുടെയും പേട്ടതുള്ളല്‍ സമാപിച്ചത്.ഇരുസംഘങ്ങളേയും പേട്ട കൊച്ചമ്പലത്തില്‍ വച്ച് ദേവസ്വം ഭാരവാഹികള്‍ പൊന്നാടയും,പൂമാലയും ചാര്‍ത്തിയാണ് സ്വീകരിച്ചത്.ശ്രീധര്‍മ്മ ശാസ്താ ക്ഷേത്രത്തിലെത്തിയ ഇരു സംഘങ്ങേളേയും ദേവസ്വം ബോര്‍ഡ് പ്രസിഡന്റ് അഡ്വ .എന്‍ വാസു,മെമ്പര്‍മാരായ പി എം തങ്കപ്പന്‍,കെ.എസ് രവി,ഡെപ്യൂട്ടി കമ്മീഷണര്‍ കൃഷ്ണകുമാര വാര്യര്‍,അസി. ദേവസ്വം കമ്മീഷണര്‍ ഒ.ജി ബിജു,എരുമേലി അഡ്മിനിസ്‌ട്രേറ്റീവ് ഓഫീസര്‍ എസ് ആര്‍ രാജീവ്, വലിയമ്പലം മേശാന്തി എം പി ശ്രീവത്സന്‍ നമ്പൂതിരി,കീഴ്ശാന്തി എ. എന്‍ ഹരികൃഷ്ണന്‍ നമ്പൂതിരി, ബിജെപി സംസ്ഥാന സമിതി അംഗം എന്‍ ഹരി,
ജില്ലാ പോലീസ് സുപ്രണ്ട് ജി,ജയദേവ് ഐ പി എസ് .എന്നിവര്‍ പേട്ട സംഘങ്ങളെ വിവിധ സ്ഥലങ്ങളില്‍ സ്വീകരിച്ചു.