കര്ണാടകയില് സിദ്ധരാമയ്യ തന്നെ മുഖ്യമന്ത്രി
നിയമസഭാ തിരഞ്ഞെടുപ്പില് കോണ്ഗ്രസ് വന് വിജയം നേടിയ കര്ണാടകയില് മുതിര്ന്ന നേതാവ് സിദ്ധരാമയ്യ മുഖ്യമന്ത്രിയാകും. ഏറെ നീണ്ട ചര്ച്ചകള്ക്കൊടുവിലാണു തീരുമാനം. ആദ്യ ടേമില് സിദ്ധരാമയ്യയും പിന്നീട് ഡി.കെ. ശിവകുമാറും മുഖ്യമന്ത്രിയാകുമെന്നാണു റിപ്പോര്ട്ട്. സത്യപ്രതിജ്ഞ നാളെ ഉച്ചകഴിഞ്ഞ് 3.30-ന് നടക്കും. ബെംഗളൂരുവില് സിദ്ധരാമയ്യയുടെ വസതിക്കു മുന്നില് അനുയായികള് ആഘോഷം തുടങ്ങി.മുഖ്യമന്ത്രിയായി സിദ്ധരാമയ്യയെ ഇന്നു തന്നെ പ്രഖ്യാപിക്കും. രാഹുല് ഗാന്ധി, മല്ലികാര്ജുന് ഖര്ഗെ, കെ.സി. വേണുഗോപാല് തുടങ്ങിയവര് സിദ്ധരാമയ്യയും ഡി.കെ. ശിവകുമാറുമായി ചര്ച്ച നടത്തി. ഉപമുഖ്യമന്ത്രിസ്ഥാനം ഏറ്റെടുക്കണമെന്ന് ഹൈക്കമാന്ഡ് ഡി.കെ. ശിവകുമാറിനോട് ആവശ്യപ്പെട്ടു. മുഖ്യമന്ത്രി പദം പങ്കിടാമെന്ന് ഡികെയ്ക്ക് രാഹുലും സോണിയയും ഉറപ്പ് നല്കും. സോണിയയുടെ വീട്ടില് രാഹുലും ഡികെയും തമ്മില് കൂടിക്കാഴ്ച നടത്തുകയാണ്.