അടല് തുരങ്കം ഇന്ന് പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും.
റോത്തങ്ങിലെ അടല് തുരങ്കം ഇന്ന് പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. ഹിമാലയന് മലനിരകളെ തുരന്ന് നിര്മിച്ച രാജ്യത്തിന്റെ അഭിമാന പദ്ധതിയായി കണക്കാക്കപ്പെടുന്ന തുരങ്കം പ്രധാനമന്ത്രി നേരിട്ടെത്തിയാണ് ഉദ്ഘാടനം ചെയ്യുന്നത്. ഏഴു മാസത്തിന് ശേഷമുള്ള പ്രധാനമന്ത്രിയുടെ നേരിട്ടുള്ള ഉദ്ഘാടന പരിപാടിയാണിത്.പ്രതിരോധ മന്ത്രാലയത്തിന് കീഴിലുള്ള ബോര്ഡര് റോഡ്സ് ഓര്ഗനൈസേഷനാണ് അടല് തുരങ്കം നിര്മ്മിച്ചത്. 3,086 കോടിയാണ് പദ്ധതിയുടെ നിര്മാണച്ചെലവ്. മണാലി-ലേ ദേശീയ പാതയിലെ ദൂരം 45 കിലോമീറ്ററിലധികം കുറക്കുമെന്നതാണ് തുരങ്കത്തിന്റെ പ്രാധാന്യം. പത്തു വര്ഷം കൊണ്ടാണ് പണി പൂര്ത്തിയാക്കിയത്.ലോകത്തെ തന്നെ ഏറ്റവും വലിയ ഹൈവേ തുരങ്കമാണ് 1000അടി ഉയരവും 9.2 കിലോമീറ്റര് നീളവുമുള്ള നീളമുള്ള റോത്തങ് തുരങ്കം. അടല് ബിഹാരി വാജ്പേയ് സര്ക്കാറാണ് തുരങ്കം നിര്മിക്കാനുള്ള തീരുമാനം കൈക്കൊണ്ടത്. ചൈനയുമായി അതിര്ത്തി സംഘര്ഷം നിലനില്ക്കേ പദ്ധതിക്ക് പ്രാധാന്യമേറെയാണ്.
ഉദ്ഘാടനത്തിനുള്ള എല്ലാ സജ്ജീകരണങ്ങളും പൂര്ത്തിയാക്കിയതായി പ്രതിരോധ മന്ത്രാലയം അറിയിച്ചു. ഇതിന് മുന്പ് ലഡാക്കിലെ സൈനികരെ സന്ദര്ശിക്കാനും അയോദ്ധ്യ ഭൂമി പൂജക്കും പശ്ചിമബംഗാളിലെ ചുഴലിക്കാറ്റ് ബാധിത മേഖലകള് സന്ദര്ശിക്കാനുമാണ് മോദി കോവിഡ് കാലത്ത് ഡല്ഹി വിട്ട് പുറത്തുപോയത്. പ്രധാനമന്ത്രിക്കൊപ്പം പ്രതിരോധ മന്ത്രി രാജ്നാഥ് സിങ്ങും കൂടെയുണ്ടാകും.മലയാളിയായ ചീഫ് എന്ജിനീയര് കണ്ണൂര് സ്വദേശി കെ.പി. പുരുഷോത്തമനാണ് പദ്ധതിക്ക് നേത്വത്വം നല്കിയത്.