ഗവര്‍ണറെ നയപ്രഖ്യാപനത്തിന് ക്ഷണിക്കും
തിരുവനന്തപുരം: പതിനഞ്ചാം കേരള നിയമസഭയില്‍ ഗവര്‍ണറുടെ നയപ്രഖ്യാപന പ്രസംഗത്തോടെ നിയമസഭയുടെ ബജറ്റ് സമ്മേളനം ഈ മാസം വിളിച്ച് ചേര്‍ക്കാന്‍ മന്ത്രിസഭാ യോഗം തീരുമാനിച്ചു. പതിനഞ്ചാം കേരള നിയമസഭയുടെ ഏഴാം സമ്മേളനം ഡിസംബര്‍ അഞ്ചിന് ആരംഭിച്ച് 13ന് പിരിഞ്ഞെങ്കിലും സമ്മേളനം അവസാനിച്ചതായി ഗവര്‍ണറെ ഔദ്യോഗികമായി അറിയിച്ചിരുന്നില്ല. പുതുവര്‍ഷത്തെ ആദ്യ സമ്മേളനം ഗവര്‍ണറുടെ നയപ്രഖ്യാപന പ്രസംഗത്തോടെയാണ് ആരംഭിക്കേണ്ടത്. നയപ്രഖ്യാപന പ്രസംഗം നീട്ടുന്നതിന്റെ ഭാഗമായിട്ടാണ് ഏഴാം സമ്മേളനം കഴിഞ്ഞ വിവരം ഔദ്യോഗികമായി ഗവര്‍ണറെ അറിയിക്കാതിരുന്നത്.
നിയമസഭാ സമ്മേളനം പിരിയുന്നതായി ഗവര്‍ണറെ അറിയിക്കാനും, നയപ്രഖ്യാപന പ്രസംഗത്തിന് ഗവര്‍ണര്‍ ആരിഫ് മുഹമ്മദ് ഖാനെ ക്ഷണിക്കാനുമാണ് ഇപ്പോള്‍ സര്‍ക്കാര്‍ തീരുമാനിച്ചിരിക്കുന്നത്. സജി ചെറിയാന്റെ സത്യപ്രതിജ്ഞയ്ക്ക് ഗവര്‍ണര്‍ അനുമതി നല്‍കിയതിന് പിന്നാലെയാണ് തീരുമാനം. ഈ മാസം തന്നെ സമ്മേളനം വിളിക്കാനാണ് ആലോചന, ഇതിനായി നാളെ പ്രത്യേക മന്ത്രിസഭായോഗം ഓണ്‍ലൈനായി ചേരും. 
സഭാ സമ്മേളനം അവസാനിപ്പിച്ചതായി കാട്ടി വിജ്ഞാപനം ഇറക്കും.ഡിസംബര്‍ 13നാണ് നിയമസഭാ സമ്മേളനം അവസാനിച്ചത്. എന്നാല്‍ ഇക്കാര്യം ഇതുവരെ രാജ്ഭവനെ ഔദ്യോഗികമായി അറിയിച്ചിരുന്നില്ല. പതിനഞ്ചാം നിയമസഭയുടെ ഏഴാം സമ്മേളനമായിരുന്നു ഇത്. അടുത്ത സമ്മേളനം വരെ നയപ്രഖ്യാപനപ്രസംഗം പരമാവധി നീട്ടിക്കൊണ്ടു പോകാനായിരുന്നു സര്‍ക്കാര്‍ ആലോചന.
