2000 രൂപ നോട്ടുകളുടെ അച്ചടി നിര്‍ത്തില്ലെന്ന് ധനമന്ത്രാലയം.

2000 രൂപ നോട്ടുകളുടെ അച്ചടി നിര്‍ത്തില്ലെന്ന് ധനമന്ത്രാലയം ലോക്‌സഭയില്‍ അറിയിച്ചു. പൊതുജനങ്ങളുടെ ഇടപാട് ആവശ്യം സുഗമമാക്കുന്നതിന് ആവശ്യമുള്ള നോട്ടുകളുടെ മിശ്രിതം നിലനിര്‍ത്താന്‍ റിസര്‍വ് ബാങ്കുമായി ആലോചിച്ച് നോട്ടുകള്‍ അച്ചടിക്കാന്‍ തീരുമാനിച്ചതായി ധനകാര്യ സഹമന്ത്രി അനുരാഗ് ഠാക്കൂര്‍ രേഖാമൂലം മറുപടി നല്‍കി. അതേസമയം, 2,000 രൂപയുടെ ബാങ്ക് നോട്ടുകളുടെ അച്ചടി സര്‍ക്കാര്‍ നിര്‍ത്തലാക്കാന്‍ തീരുമാനമില്ലെന്നും മന്ത്രി പറഞ്ഞു.2019 മാര്‍ച്ച് 31ലെ 32,910 ലക്ഷം നോട്ടുകളെ അപേക്ഷിച്ച് 2020 മാര്‍ച്ച് 31 വരെ 27,398 ലക്ഷം 2000 രൂപയുടെ നോട്ടുകള്‍ പ്രചാരത്തിലുണ്ടെന്നും ഠാക്കൂര്‍ അറിയിച്ചു. കോവിഡ് 19 പകര്‍ച്ചവ്യാധി മൂലം രാജ്യവ്യാപകമായി പൂട്ടിയിട്ടിരിക്കുന്നതിനാല്‍ നോട്ടുകളുടെ അച്ചടി താല്‍ക്കാലികമായി നിര്‍ത്തിയതായി റിസര്‍വ് ബാങ്ക് അറിയിച്ചിട്ടുണ്ടെന്നും അദ്ദേഹം പറഞ്ഞു.